ایس ای سی پی نے سگنیچر ریزیڈنسی ریٹ آئی پی او کے لیے پراسپیکٹس کی منظوری دے دی

سیکیورٹیز اینڈ ایکسچینج کمیشن آف پاکستان (ایس ای سی پی) نے سگنیچر ریزیڈنسی ریئٹ (ایس آر آر) کی آفر فار سیل اور ابتدائی عوامی پیشکش (آئی پی او) کے لیے پراسپیکٹس کی منظوری دے دی ہے، جس کے بعد پاکستان اسٹاک ایکسچینج (پی ایس ایکس) پر اس کی لسٹنگ کی راہ ہموار ہو گئی ہے۔

ریگولیٹر کے مطابق اس پیشکش میں 82.5 لاکھ یونٹس شامل ہیں، جو ریئٹ کے کل یونٹس کا 25 فیصد بنتے ہیں۔ آفر فار سیل موجودہ یونٹ ہولڈرز کی جانب سے کی جا رہی ہے، جو اپنے حصص کا ایک چوتھائی حصہ تناسب کے ساتھ عام عوام کو فروخت کریں گے۔

سگنیچر ریزیڈنسی ریئٹ ایک شریعت کے مطابق ڈیولپمنٹل ریئٹ اسکیم ہے، جس کا انتظام عارف حبیب ڈولمین ریئٹ مینجمنٹ لمیٹڈ کر رہا ہے۔

یہ آئی پی او جاری مالی سال 2025-26 کے دوران پی ایس ایکس کے مین بورڈ پر پانچویں لسٹنگ ہوگی، جبکہ رواں سال لسٹ ہونے والی یہ دوسری ریئٹ اسکیم ہوگی۔ اس اضافے کے بعد پی ایس ایکس پر لسٹڈ ریئٹ اسکیموں کی مجموعی تعداد پانچ ہو جائے گی۔

مارکیٹ مبصرین لسٹنگز میں اضافے کو سرمایہ جاتی منڈیوں کے ذریعے فنانسنگ پر اجرا کنندگان کے اعتماد کی بحالی کی علامت قرار دے رہے ہیں، جس کے ساتھ ساتھ ریٹیل اور ادارہ جاتی سرمایہ کاروں کے لیے سرمایہ کاری کے مواقع میں بھی وسعت آ رہی ہے۔

ایس ای سی پی نے کہا کہ پی ایس ایکس پر لسٹنگز میں تیزی مقامی سرمایہ تشکیل میں معاون ثابت ہو رہی ہے، مالی شمولیت کو مضبوط بنا رہی ہے اور شفافیت کے ساتھ کارپوریٹ گورننس کے معیارات کو بہتر کر رہی ہے۔

ریگولیٹر کے مطابق اس نے حال ہی میں پبلک آفرنگ ریگولیشنز 2017 میں نظرثانی کی ہے تاکہ منظوری کے دورانیے میں کمی اور آپریشنل کارکردگی میں بہتری لا کر آئی پی او کے عمل کو مزید ہموار بنایا جا سکے۔ ان اصلاحات کا مقصد اجرا کنندگان کے لیے سرمایہ تک رسائی کو آسان بنانا اور سرمایہ کاروں کے لیے آئی پی او کا تجربہ بہتر بنانا ہے۔