میزان بینک نے ڈاکٹر سید عامر علی کو صدر اور سی ای او مقرر کر دیا

قیادت میں ایک اہم تبدیلی کے تحت پاکستان کے سب سے بڑے اسلامی بینک، میزان بینک لمیٹڈ (ایم ای بی ایل) نے ڈاکٹر سید عامر علی کو اپنا صدر اور چیف ایگزیکٹو آفیسر (سی ای او) مقرر کرنے کا اعلان کیا ہے۔ یہ تقرری 30 دسمبر 2025 سے نافذالعمل ہوگی جس میں وہ بانی صدر اور سی ای او عرفان صدیقی کی جگہ لیں گے۔

لسٹڈ اسلامی بینک نے منگل کو پاکستان اسٹاک ایکسچینج (پی ایس ایک) کو بھیجے گئے ایک نوٹس میں اس پیش رفت سے آگاہ کیا۔

نوٹس میں کہا گیا کہ ہمیں آپ کو مطلع کرنا ہے کہ بانی صدر و سی ای اوعرفان صدیقی کی جگہ ڈاکٹر سید عامر علی کو 30 دسمبر 2025 سے میزان بینک لمیٹڈ کا صدر اور سی ای او مقرر کردیا گیا ہے۔

عرفان صدیقی میزان بینک کے بورڈ آف ڈائریکٹرز کے رکن کے طور پر اپنی خدمات جاری رکھیں گے۔

بورڈ آف ڈائریکٹرز نے عرفان صدیقی کی قیادت، انتھک محنت اور ان کی گراں قدر خدمات کا باقاعدہ اعتراف کیا ہے جن کی بدولت میزان بینک قائم ہوا اور ترقی کرکے پاکستان کی کارپوریٹ تاریخ کی ایک عظیم کامیابی اور عالمی اسلامی بینکاری کی صنعت میں ایک نئی مثال بن کر ابھرا۔

نوٹس میں مزید کہا گیا کہ ان کی مستقل وابستگی اور پیش قدمی کا کردار ملک میں اسلامی بینکنگ کی بنیاد رکھنے اور بینک کی شاندار ترقی اور کامیابی کے سفر کو آگے بڑھانے میں بنیادی حیثیت رکھتا ہے۔

میزان بینک کی ویب سائٹ پر دستیاب معلومات کے مطابق ڈاکٹر سید عامر علی ایک تجربہ کار اسلامی بینکنگ پروفیشنل ہیں جنہوں نے فنانس، اکاؤنٹنگ، بزنس اور قانون میں تعلیمی قابلیت حاصل کی ہے۔

انہوں نے فنانس، ٹریژری، سرمایہ کاری اور کارپوریٹ بینکنگ میں 20 سال سے زائد تجربہ حاصل کیا اور اے ایف فرگوسن اینڈ کمپنی، شیل، بینک اسلامی پاکستان لمیٹڈ اور میزان بینک سمیت ملکی و بین الاقوامی اداروں کے ساتھ کام کیا ہے۔

علی نے پہلی بار 2006 میں میزان بینک میں شمولیت اختیار کی جہاں انہوں نے کارپوریٹ اور انویسٹمنٹ گروپ کی قیادت کی، اس کے بعد 2018 میں بینک اسلامی میں منتقل ہوئے اور 2023 میں دوبارہ میزان بینک میں شامل ہوگئے۔