خام تیل کی قیمتیں مسلسل دوسرے ہفتے کمی کے ساتھ بند ہونے کی جانب گامزن

خام تیل کی قیمتوں میں جمعہ کو کمی دیکھی گئی اور مسلسل دوسرے ہفتے بھی قیمتیں گراوٹ کے ساتھ بند ہونے کی جانب گامزن رہیں۔ اس کمی کی بنیادی وجہ روس اور یوکرین کے درمیان امن معاہدے کے بڑھتے ہوئے امکانات ہیں جس نے وینزویلا کے آئل ٹینکرز کی ناکہ بندی سے پیدا ہونے والے سپلائی کے خدشات کو پسِ پشت ڈال دیا ہے۔

برنٹ کروڈ فیوچرز 9 سینٹ یا 0.2 فیصد کمی کے ساتھ 59.73 ڈالرفی بیرل پر ٹریڈ ہوا، اسی طرح امریکی ویسٹ ٹیکساس انٹرمیڈیٹ کروڈ 16 سینٹ یا 0.3 فیصد کمی کے ساتھ 55.99 ڈالر فی بیرل پر ٹریڈ ہوا۔ ہفتہ وار بنیادوں پر دونوں بینچ مارکس میں 2 فیصد سے زیادہ کی گراوٹ ریکارڈ کی گئی۔

امریکی صدر ڈونلڈ ٹرمپ نے جمعرات کو کہا کہ ان کا ماننا ہے کہ یوکرین میں جنگ کے خاتمے کے لیے ہونے والے مذاکرات کسی نتیجے کے قریب پہنچ رہے ہیں۔ ان کا یہ بیان اس ہفتے کے آخر میں روسی حکام کے ساتھ ہونے والی امریکی ملاقات سے قبل سامنے آیا ہے۔

ایک اور ممکنہ جیوپولیٹیکل محرک کے طور پر، فوری طور پر واضح نہیں تھا کہ امریکہ ٹرمپ کے اعلان کے تحت وینزویلا کے ٹینکرز پر پابندی کیسے نافذ کرے گا جو عالمی سپلائی کا تقریباً 1 فیصد حصہ بنتے ہیں۔ ایک غیر معمولی اقدام کے طور پر، امریکی کوسٹ گارڈ نے پچھلے ہفتے ایک وینزویلا کے تیل کے ٹینکر کو ضبط کیا۔

آئی جی کے تجزیہ کار ٹونی سائکامور نے جمعہ کو کہا کہ نفاذ کی تفصیلات پر غیر یقینی صورتحال اور اس امید نے کہ ممکنہ امریکی قیادت میں یوکرین امن معاہدہ اب بھی سامنے آسکتا ہے، عالمی سپلائی کے خدشات کو کم کررہی ہے اور جیوپولیٹیکل رسک پریمیم کو معتدل کررہی ہے۔

تجزیہ کاروں کا کہنا ہے کہ روسی تیل کو نشانہ بنانے والے مزید اقدامات، مارکیٹ کے لیے ٹرمپ کی جانب سے وینزویلا کے آئل ٹینکرز کی ناکہ بندی کے مقابلے میں سپلائی کے لیے زیادہ بڑا خطرہ ثابت ہو سکتے ہیں۔

ذرائع کے مطابق وینزویلا نے جمعرات کو خام تیل لے جانے والے دو ایسے بڑے بحری جہازوں کو چین روانہ ہونے کی اجازت دے دی ہے جن پر پابندیاں عائد نہیں تھیں۔

بینک آف امریکہ کے تجزیہ کار توقع کرتے ہیں کہ تیل کی کم قیمت سپلائی کی مقدار کو کم کرے گی جس سے قیمتوں کے آزادانہ زوال کو روکا جا سکتا ہے۔