رئیل اسٹیٹ اسٹیک ہولڈرز کے اعتراضات، اسلام آباد میں جائیداد کا ویلیوایشن ٹیبلز معطل

فیڈرل بورڈ آف ریونیو (ایف بی آر) نے اسلام آباد میں غیر منقولہ جائیدادوں کے حال ہی میں نوٹیفائی شدہ ویلیوایشن ٹیبلز کو معطل کر دیا ہے کیونکہ رئیل اسٹیٹ کے اسٹیک ہولڈرز نے کچھ علاقوں میں بڑھائی گئی قیمتوں پر اعتراضات اٹھائے تھے۔

یہ اقدام اس وقت سامنے آیا ہے جب ٹیکس حکام نے منصفانہ مارکیٹ ویلیوز کا دوبارہ جائزہ لینے کا فیصلہ کیا ہے، جبکہ پرانا ویلیوایشن نظام اسی وقت تک نافذ رہے گا جب تک نئی قیمتیں جاری نہیں ہوتیں یا یکم جنوری 2026 تک، جو بھی پہلے ہو۔

چند روز قبل ایف بی آر نے ایس آر او 2392(1)/2025 کے تحت 08-12-2025 کو اسلام آباد کی رہائشی اور تجارتی غیر منقولہ جائیدادوں کی قیمتوں میں نمایاں اضافہ کیا تھا تاکہ یہ ریئل مارکیٹ ویلیوز کے مطابق ہو جائیں۔

ایف بی آر نے منگل کو کہا کہ 29اکتوبر 2024 کو پورے پاکستان کے لیے ویلیوایشن ٹیبلز میں ترمیم کی گئی تھی، سوائے ضلع اسلام آباد کے، کیونکہ وہاں ایف ٹی او کی ایک شکایت زیر التوا تھی۔ بعد ازاں، 08 اگست 2025 کو اسلام آباد کی غیر منقولہ جائیدادوں کے لیے منصفانہ مارکیٹ ویلیوز کے حوالے سے ایس آر او 2392(1)/2025 نوٹیفائی کی گئی۔

انہوں نے مزید کہا کہ تاہم، رئیل اسٹیٹ ایسوسی ایشنز اور دیگر نے ایف بی آر سے ٹیبل کا دوبارہ جائزہ لینے کی درخواست کی کیونکہ بعض علاقوں کی قیمتیں حقیقی مارکیٹ ویلیوز سے زیادہ ظاہر ہو رہی تھیں۔ کچھ معاملات کی جانچ پڑتال کے بعد یہ بات سامنے آئی کہ کچھ اعتراضات درست تھے۔

چنانچہ فیصلہ کیا گیا ہے کہ ضلع اسلام آباد کے لیے ویلیوایشن ٹیبل کو دوبارہ جانچا جائے۔

لہٰذا، 08دسمبر 2025 کو جاری کردہ ایس آر او 2392(I)/2025 کو یکم جنوری 2026 یا اسلام آباد کی غیر منقولہ جائیدادوں کی نئی منصفانہ مارکیٹ ویلیوز کے نوٹیفکیشن تک معطل کر دیا گیا ہے۔

اس دوران، یکم جنوری 2026 تک یا اسلام آباد کے لیے نئے ایس آر او جاری ہونے تک، ایس آر او 1180(I)/2022 مورخہ 27 جولائی 2022، جو ایس آر او 1610(I)/2022 مورخہ 25اگست 2022 سے تبدیل شدہ ہے، نافذ رہے گا۔