فیصل آباد: بوائلر دھماکہ، 14افراد جاں بحق اور 7 زخمی، ریسکیو آپریشن جاری

فیصل آباد میں کیمیکل فیکٹری کا بوائلر پھٹنے سے بڑے پیمانے پر تباہی ہوئی ہے۔ پنجاب ریسکیو 1122 کے عہدیداروں نے تصدیق کی ہے کہ فیصل آباد کے علاقے ملک پور میں فیکٹری میں بوائلر پھٹنے سے کم از کم 14 افراد جاں بحق اور 7 دیگر زخمی ہوگئے۔

یہ دھماکہ کبڈی اسٹیڈیم گراؤنڈ کے علاقے میں واقع کیمیکل فیکٹری کے اندر پیش آیا۔

دھماکے کی شدت سے فیکٹری کی عمارت منہدم ہوگئی اور آس پاس کے کئی مکانوں کی چھتیں بھی گرگئیں۔

ترجمان ریسکیو 1122 کے مطابق جاں بحق ہوانے والوں میں 3 فیکٹری ملازمین اور باقی مقامی رہائشی شامل ہیں۔

انہوں نے کہا کہ عمارت سے کئی افراد زندہ بچا لیا گیا ہے جبکہ زخمیوں کو اسپتال میں طبی امداد فراہم کی جارہی ہے۔

ریسکیو حکام کا کہنا ہے کہ عمارت کا ملبہ ہٹانے کا کام ابھی جاری ہے۔

وزیرِ اعلیٰ پنجاب مریم نواز شریف نے فیصل آباد کی کیمیکل فیکٹری میں بوائلر دھماکے میں قیمتی جانوں کے ضیاع پر گہرا دکھ اور افسوس کا اظہار کیا ہے۔

وزیرِ اعلیٰ نے متاثرہ خاندانوں سے تعزیت اور ہمدردی کا اظہار کیا۔

مریم نواز شریف نے اس واقعے کی رپورٹ فیصل آباد کے کمشنر سے طلب کرنے کی بھی ہدایت دی ہے۔