میٹکو فوڈز کا اسپائس اور مصالحہ سیکٹر فلک فوڈز میں منتقل

معروف چاول برآمد کنندہ کمپنی میٹکو فوڈز لمیٹڈ نے اسپائس، مصالحہ پیکجنگ شعبے کو اپنی مکمل ملکیت والی ذیلی کمپنی فلک فوڈز (پرائیویٹ) لمیٹڈ کے حوالے کردیا ہے۔

لسٹڈ کمپنی نے پیر کو پاکستان اسٹاک ایکسچینج میں نوٹس جاری کر کے اپنے اسٹیک ہولڈرز کو اس بارے میں مطلع کیا۔

نوٹس میں بتایا گیا کہ 9 مئی 2025 کو کی گئی وضاحت کے بعد کمپنی نے 17 نومبر 2025 کو فلک فوڈز (پرائیویٹ) لمیٹڈ کے ساتھ ایک بزنس ٹرانسفر ایگریمنٹ پر دستخط کیے جس کے تحت میٹکو فوڈز کے مصالحہ پیکجنگ سیکٹر کو ’فلک فوڈز‘ برانڈ کے تحت ذیلی کمپنی کو منتقل کر دیا گیا ہے۔

یاد رہے کہ مئی میں کمپنی نے اپنے کارن اسٹارچ بزنس کے حوالے سے ایک کارپوریٹ اسٹرکچرنگ منصوبے کی بھی منظوری دی تھی۔

تجویز کردہ منصوبے کے تحت میٹکو فوڈز اپنا کارن اسٹارچ بزنس اپنی مکمل ملکیت والی ذیلی کمپنی میٹکو کارن پروڈکٹس (پرائیویٹ) لمیٹڈ (ایم سی پی پی ایل) کو منتقل کرے گی جس کے بدلے میں ایم سی پی پی ایل میٹکو فوڈز کو شیئرز جاری کرے گی۔

میٹکو فوڈز کی بنیاد 1964 میں میٹکو رائس پروسیسنگ پرائیویٹ لمیٹڈ کے طور پر رکھی گئی تھی۔ یہ کمپنی بنیادی طور پر چاول، چاول پروٹین، چاول گلوکوز، پنک سالٹ، مصالحہ جات، کنڈیمینٹس، ڈیزرٹ مکس وغیرہ کی پروسیسنگ اور برآمدات میں مصروف عمل ہے۔

یہ کمپنی ملک کی سب سے بڑی چاول برآمد کنندگان میں سے ایک ہے اور اس کے فلیگ شپ برانڈ ’فلک‘ کی برآمدات دنیا کے 65 سے زائد ممالک میں کی جاتی ہیں۔