کوہاٹ سیمنٹ کا توانائی منصوبوں کو تیز کرنیکا اعلان، 28.5 میگاواٹ پاور پلانٹ میں 8 ارب کی سرمایہ کاری کی جائیگی

کوہاٹ سیمنٹ کمپنی لمیٹڈ (کے او ایچ سی) نے توانائی کے انفرااسٹرکچر منصوبوں کو تیز کرنے کا اعلان کیا ہے تاکہ آپریشنل اخراجات کم کیے جا سکیں اور پیداوار کی کارکردگی بہتر ہو، یہ تفصیلات کمپنی کی حالیہ اینالسٹ بریفنگ میں شیئر کی گئیں جس میں عارف حبیب لمیٹڈ (اے ایچ ایل) نے شرکت کی۔

عارف حبیب لمیٹڈ کی رپورٹ کے مطابق کمپنی کا 28.5 میگاواٹ کوئلے سے چلنے والا کیپٹیو پاور پلانٹ زیر تعمیر ہے، جسے مالی سال 26 کی چوتھی سہ ماہی سے مالی سال 27 کی پہلی سہ ماہی کے درمیان مکمل کرنے کا ہدف ہے۔

منصوبے پر کل 8 ارب روپے کی سرمایہ کاری کی جائے گی جو کمپنی کی قومی گرڈ پر انحصار کم کرنے میں مددگار ثابت ہوگی۔

رپورٹ میں مزید کہا گیا کہ کوہاٹ سیمنٹ اپنی سولر جنریشن کی صلاحیت کو 15.3 میگاواٹ سے بڑھا کر 20 میگاواٹ کر رہی ہے جس سے کمپنی کے قابل تجدید توانائی کے شعبے میں حصہ بڑھے گا اور گرڈ پر انحصار مزید کم ہوگا۔

پاکستان میں متبادل توانائی کے ذرائع، خاص طور پر سولر، تیزی سے مقبول ہو رہے ہیں اور رہائشی و تجارتی شعبوں میں بڑھتی ہوئی طلب کے پیش نظر نیٹ میٹرنگ یونٹس میں نمایاں اضافہ دیکھا گیا ہے۔

عارف حبیب لمیٹڈ کے اعداد و شمار کے مطابق کے الیکٹرک صارفین کو چھوڑ کر، نیٹ میٹرنگ یونٹس ستمبر 2024 میں 70.35 گیگاواٹ آور سے بڑھ کر ستمبر 2025 میں 142.67 گیگاواٹ آور تک پہنچ گئے، یعنی 100 فیصد سے زائد اضافہ ریکارڈ کیا گیا۔

دریں اثنا کمپنی کا منصوبہ بند گرین فیلڈ سیمنٹ توسیعی منصوبہ ہشار میں اب بھی منصوبہ بندی کے مرحلے میں ہے اور مشینری کی خریداری مقامی طلب کے تسلسل پر منحصر ہے۔

مالی امور کے حوالے سے، کمپنی کے پاس کافی لیکویڈٹی موجود ہے اور آئندہ پاور پروجیکٹ کے لیے مالی اعانت 50:50 قرض اور ایکویٹی کے تناسب پر ترتیب دی گئی ہے۔

مالی سال 26 کی پہلی سہ ماہی میں کمپنی نے 2.9 ارب روپے کا منافع حاصل کیا جو پچھلی مالی سال کی پہلی سہ ماہی میں 3.4 ارب روپے تھا۔

اس سے قبل کمپنی نے اپنی مکمل ملکیت والی ذیلی کمپنی، الٹرا پراپرٹیز (پرائیویٹ) لمیٹڈ کے قیام کا اعلان کیا تھا جو اس کے رئیل اسٹیٹ سیکٹر میں داخلے کی علامت ہے۔