پنجاب ریونیو اتھارٹی کا ٹیکس نادہندگان کے خلاف سخت کارروائی کا اعلان

پنجاب ریونیو اتھارٹی (پی آر اے) نے خبردار کیا ہے کہ ٹیکس ادائیگی میں بلاوجہ تاخیر یا عدم ادائیگی کی صورت میں کاروباری اداروں کو سیل کردیا جائے گا۔

یہ اعلان چیئرمین پی آر اے معظم اقبال سپرا کی زیرِ صدارت محکمانہ اجلاس کے دوران کیا گیا جس میں حکام کو اس بات پر بریفنگ دی گئی کہ صوبائی یا وفاقی ادارے ایسے کاروباری اداروں کو لائسنس جاری نہ کریں جو اتھارٹی کے ساتھ رجسٹرڈ نہیں ہیں۔

اجلاس میں موجودہ قوانین میں ترمیم سے متعلق سفارشات کا بھی جائزہ لیا گیا اور قانونی وِنگ کو ہدایت کی گئی کہ وہ مزید کارروائی کیلئے قانون محکمہ کو سمری ارسال کرے۔

اجلاس کے دوران شعبہ وار کارکردگی کے اہداف پر غور کیا گیا اور افسران کو ہدایت کی گئی کہ وہ 14 نومبر تک 11 نئے شعبوں میں ریونیو وصولی کے اہداف حاصل کریں۔ یہ بھی فیصلہ کیا گیا کہ صوبے بھر میں رجسٹرڈ کاروبار اور ٹیکس ریکارڈز کی رئیل ٹائم نگرانی کیلئے پی آر اے کے مانیٹرنگ ڈیش بورڈ کو اپ گریڈ کیا جائے۔

چیئرمین نے ڈویژنل انفورسمنٹ افسران کی صلاحیت بڑھانے کے لیے آن لائن تربیتی پروگرامز کے آغاز پر زور دیا۔ انہوں نے یہ بھی ہدایت کی کہ ایسے نادہندہ کاروباری اداروں کے خلاف ریکوری مہم کو تیز کیا جائے جو صارفین سے ٹیکس وصول کرتے ہیں مگر اسے اتھارٹی میں جمع نہیں کراتے۔

اجلاس میں اس بات پر اتفاق کیا گیا کہ جو بھی کاروباری ادارہ بغیر کسی جواز کے ٹیکس ادائیگی میں تاخیر کرے یا ٹیکس ادا نہ کرے، اس کے کاروباری احاطے کو سیل کردیا جائے گا۔ چیئرمین نے مزید ہدایت کی کہ تمام کاروباری مالکان ٹیکس وصولی میں شفافیت اور احتساب کو فروغ دینے کے لیے الیکٹرانک انوائس مینجمنٹ سسٹم کے مؤثر استعمال کو یقینی بنائیں۔

کاپی رائٹ بزنس ریکارڈر 2025