پاک افریقہ ٹریڈ ڈیولپمنٹ کانفرنس کا ایتھوپیا میں کامیاب اختتام

5ویں پاکستان افریقہ ٹریڈ ڈیولپمنٹ کانفرنس اور میڈ اِن پاکستان نمائش اڈِس ابابا میں کامیابی کے ساتھ اختتام پذیر ہوئی۔ تین روزہ ایونٹ میں پاکستان، ایتھوپیا اور افریقی ممالک کے تجارتی وفود، سرکاری شخصیات اور صنعتکاروں نے بھرپور شرکت کی۔

یہ تقریب وزارتِ تجارت اور ٹریڈ ڈیولپمنٹ اتھارٹی آف پاکستان (ٹڈاپ) کی جانب سے ایتھوپیا میں پاکستان کے سفارتخانے کے تعاون سے منعقد کی گئی جس میں افریقہ بھر سے سینکڑوں کاروباری رہنما، حکومتی عہدیدار اور نجی شعبے کے نمائندے شریک ہوئے، واضح رہے کہ یہ ایڈیشن اب تک کا سب سے متحرک اور مؤثر قرار پایا۔

آخری روز شرکاء کی بڑی تعداد میں ایونٹ کا دورہ کیا جہاں خریداروں اور سرمایہ کاروں کی بڑی تعداد نے مختلف شعبوں میں پاکستانی برآمد کنندگان کے ساتھ مواقع کا جائزہ لیا۔

ایونٹ میں بزنس ٹو بزنس ملاقاتیں توجہ کا مرکز رہیں، ان ملاقاتوں کے نتیجے میں اہم تجارتی مواقع، مشترکہ منصوبوں کے امکانات اور تقسیم کار کے معاہدے سامنے آئے جو اس بات کا ثبوت ہیں کہ یہ تقریب گفت و شنید کو حقیقی تجارتی نتائج میں بدلنے میں کامیاب رہی۔

دونوں طرف کے نمائندوں نے سیشنز کی پیشہ ورانہ تنظیم اور پاکستان کے صنعتی شعبے کی وسیع اقسام کو سراہا، جو دواسازی، انجینئرنگ، زرعی پروسیسنگ، ٹیکسٹائل اور صارفین کی مصنوعات تک پھیلے ہوئے ہیں۔

پاکستانی نمائش کنندگان اور حکام کے ایک وفد نے ایتھیوپیا کے صنعتی پارکس کا بھی دورہ کیا، جہاں انہیں سرمایہ کاری کی مراعات، لاجسٹکس انفراسٹرکچر، اور مینوفیکچرنگ تعاون کے مواقع سے آگاہ کیا گیا۔