سی سی ایل ہولڈنگ کی بڑی چھلانگ، مچلز فروٹ فارمز میں 1.7 ارب کے حصص حاصل کرلیے

سی سی ایل فارماسیوٹیکلز کی ایک ذیلی کمپنی، سی سی ایل ہولڈنگ (پرائیویٹ) لمیٹڈ نے مچل فروٹ فارمز لمیٹڈ میں 40.63 فیصد کی اہم حصہ داری حاصل کر لی ہے جو کمپنی کی ملکیتی ساخت میں نمایاں تبدیلی کی نشاندہی کرتی ہے۔

پاکستان اسٹاک ایکسچینج (پی ایس ایکس) کو بدھ کو جاری کردہ نوٹس کے مطابق یہ لین دین 15 اکتوبر 2025 کو شیئر پرچیز ایگریمنٹ (ایس پی اے) کے تحت انجام پایا جو 14 مئی 2025 کو طے پایا تھا اور بعد میں 18 جولائی 2025 کو ترمیم کی گئی تھی۔

معاہدے کے تحت، سیدہ میمنت محسن اور سیدہ متانت غفار نے مِچلز فروٹ فارمز لمیٹڈ کے کل 9,293,244 عام شیئرز سی سی ایل ہولڈنگ (پرائیویٹ) لمیٹڈ کو فی شیئر 180 روپے کی قیمت پر فروخت کیے جو مجموعی طور پر 1.7 ارب روپے بنتے ہیں۔

یہ معاہدہ جو کمپنی کے جاری کردہ اور ادا شدہ سرمایہ کا 40.63 فیصد نمائندگی کرتا ہے، تمام ضروری ریگولیٹری منظوریوں کے حصول اور مطلوبہ شرائط کی تکمیل کے بعد مکمل کیا گیا۔ یہ لین دین پاکستان اسٹاک ایکسچینج کے ضوابط کے مطابق نیگوشی ایٹڈ ڈیل مارکیٹ (این ڈی ایم) کے ذریعے انجام پایا۔

سی سی ایل ہولڈنگ ایک ہولڈنگ کمپنی ہے جس کی مکمل ملکیت والی ذیلی کمپنی سی سی ایل فارماسیوٹیکلز پرائیوٹ لمیٹڈ ہے جو بنیادی طور پر برانڈڈ جنرک فارماسیوٹیکل مصنوعات اور صارفین کی صحت کے مصنوعات کی تیاری اور مارکیٹنگ میں مصروف عمل ہے۔

مچلز فروٹ فارمز لمیٹڈ کی تاریخ 1933 تک جاتی ہے۔ آزادی کے بعد کمپنی کا نام انڈین ملڈورو فروٹ فرمز سے تبدیل کر کے مچلز فروٹ فارمز لمیٹڈ رکھ دیا گیا۔

کمپنی نے 1993 میں عوامی کمپنی کا درجہ حاصل کیا اور 1996 میں اسٹاک ایکسچینج میں درج ہوئی۔ کمپنی کی بنیادی سرگرمی مختلف زرعی اور کنفیکشنری مصنوعات کی تیاری اور فروخت ہے جن میں مشروبات، کیچپ اور ساسز، پریزروز، ریڈی ٹو کُک اور ریڈی ٹو ایٹ کھانے کی مصنوعات وغیرہ شامل ہیں۔