حکومت کا ملک میں ڈیجیٹل انقلاب کے فروغ کے لیے اے آئی ایڈوائزری پینل کے قیام کا فیصلہ

حکومتِ پاکستان نے ٹیکنالوجی پر مبنی معاشی ترقی کے فروغ کی حکمتِ عملی کے تحت آرٹیفیشل انٹیلی جنس (اے آئی) پر مبنی ماہرین کی ایک مشاورتی کمیٹی تشکیل دینے کا اعلان کیا ہے، جو ملک میں اے آئی سے متعلق منصوبوں کی رہنمائی اور نگرانی کرے گی۔

یہ پیش رفت ہفتے کے روز آرٹیفیشل انٹیلی جنس کے فروغ سے متعلق اجلاس کے دوران سامنے آئی ہے۔

اجلاس کی صدارت کرتے ہوئے وزیراعظم محمد شہباز شریف نے اس عزم کا اظہار کیا کہ حکومت انفارمیشن ٹیکنالوجی اور اے آئی کے فروغ کو ترجیحی بنیادوں پر آگے بڑھا رہی ہے تاکہ ابھرتی ہوئی ٹیکنالوجیز سے معاشی ترقی اور جدت کو فروغ دیا جا سکے۔

وزیراعظم نے کہا کہ ڈیجیٹل معیشت کے نفاذ کو اے آئی کے ذریعے زیادہ موثر بنایا جائے گا، تاہم اس کے ذمہ دارانہ اور محفوظ استعمال کو اولین ترجیح حاصل رہنی چاہیے۔

انہوں نے مزید زور دیا کہ قومی نظام میں اے آئی کے انضمام کے دوران ڈیٹا کے تحفظ اور خودمختاری کو یقینی بنانا نہایت ضروری ہے۔

وزیراعظم محمد شہباز شریف نے ملک میں آرٹیفیشل انٹیلی جنس (اے آئی) کے فروغ اور اس سے متعلق منصوبوں کے موثر نفاذ کے لیے اسٹیئرنگ کمیٹی کے قیام کی ہدایت کی اور اس موقع پر حکومت کے اس عزم کا اعادہ کیا کہ قومی اے آئی پالیسی پر عملدرآمد کو ہر ممکن حد تک موثر بنایا جائے گا۔

اجلاس کو حکومت کی جانب سے ملک میں اے آئی کی ترقی کے لیے کیے گئے مختلف اقدامات اور پیش رفت کے بارے میں بریفنگ دی گئی۔

اجلاس میں وفاقی وزیر برائے اقتصادی امور احد خان چیمہ، وفاقی وزیر برائے انفارمیشن ٹیکنالوجی و ٹیلی کام شزہ فاطمہ، وزیرِ مملکت برائے خزانہ و ریلوے بلال اظہر کیانی، وزیراعظم کے معاونِ خصوصی بلال بن ثاقب کے علاوہ متعلقہ اعلیٰ سرکاری حکام اور ماہرین نے شرکت کی۔