اسٹیٹ بینک نے بلند شرحِ سود پر بھاری غیرملکی قرض لینے سے گریز کیا

اسٹیٹ بینک آف پاکستان (ایس بی پی) کے گورنر جمیل احمد نے جمعرات کے روز کہا ہے کہ انٹر بینک مارکیٹ سے بروقت امریکی ڈالر کی خریداری نے بلند شرح سود پر غیر ملکی قرض لینے سے گریز میں مدد دی، جس سے ملک اپنے بیرونی قرض کی ادائیگی بروقت کر سکا اور دو سال اور چھ ماہ کے دوران زر مبادلہ کے ذخائر پانچ گنا بڑھ گئے ہیں۔

انہوں نے کراچی میں منعقدہ نویں سالانہ مائیکروفنانس کانفرنس میں کہا کہ ”اگر ہم نے انٹر بینک خریداریوں کے ذریعے اپنے ذخائر مضبوط نہ کیے ہوتے تو حکومت کو بروقت قرض کی ادائیگی کے لیے زیادہ مقدار میں اور بلند شرح سود پر قرض لینا پڑتا۔“

انہوں نے بتایا کہ ایس بی پی نے جون 2024 سے مئی 2025 کے درمیان 7.8 ارب ڈالر مارکیٹ سے خریدے۔

گورنر نے کہا کہ ملک کے زر مبادلہ کے ذخائر فروری 2023 کی سطح کے مقابلے میں تقریباً پانچ گنا زیادہ ہیں، جو مرکزی بینک کی اسٹریٹجک انٹر بینک فارن ایکسچینج خریداریوں کی عکاسی کرتے ہیں تاکہ ایس بی پی کے زر مبادلہ کے ذخائر مضبوط رہیں جیسا کہ مرکزی بینک کے پریس بیان میں بتایا گیا ہے۔

اسٹیٹ بینک آف پاکستان ( ایس بی پی ) کے گورنر جمیل احمد نے نوٹ کیا کہ حالیہ برسوں میں اپنائی گئی مشکل مگر ضروری پالیسی اور ریگولیٹری اقدامات نے معاشی استحکام کا دور شروع کیا۔

انہوں نے پاکستان کے معاشی اشاریوں میں بہتری کو اجاگر کرتے ہوئے کہا کہ مہنگائی میں نمایاں کمی آئی ہے اور درمیانی مدت میں یہ حکومت کے ہدف 5 فیصد سے 7 فیصد کے دائرے میں رہنے کا امکان ہے، “اگرچہ حالیہ سیلاب کی وجہ سے کچھ وقتی قیمتوں کا دباؤ موجود ہے”۔

گورنر نے کہا کہ جامع اقتصادی ترقی حاصل کرنے کے لیے پائیدار معاشی استحکام ضروری ہے جو کمیونٹیز کو بہتر بنائے اور سب کے لیے خوشحالی کو یقینی بنائے۔

انہوں نے ایس بی پی کی مائیکروفنانس کے لیے طویل مدتی وابستگی کو بھی دوہرایا، جسے جامع ترقی کا محرک سمجھا جاتا ہے۔ گورنر احمد نے کہا کہ ایس بی پی نے مائیکروفنانس بینکوں کے پروڈینشل ریگولیشنز میں جامع ترامیم کی ہیں تاکہ قواعد پر مبنی نظام سے اصول پر مبنی نظام کی جانب منتقلی ممکن ہو۔ ان اصلاحات میں شامل ہیں: مائیکروانٹرپرائز قرضوں پر پابندیوں کا خاتمہ، زیادہ لچک کی اجازت، زراعت و لائیواسٹاک قرض کی الگ کیٹیگری کا تعارف، زراعت، مائیکروانٹرپرائز اور ہاؤسنگ قرضوں کی حد بڑھا کر 5 ملین روپے اور عمومی قرضوں کی حد 500,000 روپے تک کرنا۔

گورنر نے یقین دلایا کہ مرکزی بینک مائیکروفنانس سیکٹر کے ساتھ مکمل طور پر تعاون کرنے کے لیے تیار ہے تاکہ اس کی لچک مضبوط ہو، صارفین کا تحفظ یقینی بنایا جائے، اور رسائی بڑھائی جائے۔ انہوں نے کہا، “ہم سب مل کر یہ یقینی بنا سکتے ہیں کہ مائیکروفنانس جامع، لچکدار اور پائیدار ترقی میں اپنا اہم کردار ادا کرتی رہے۔”

جمیل احمد نے کہا کہ ایس بی پی کی مانیٹری پالیسی اور ریگولیٹری کوششیں حکومت کی مسلسل مالی استحکام کی حکمت عملی سے مکمل ہوئی ہیں، جس سے مہنگائی اور بیرونی کھاتوں پر دباؤ محدود کرنے میں مدد ملی ہے۔