سرکاری اداروں کی نجکاری میں بین الاقوامی شہرت یافتہ ماہرین کی خدمات حاصل کی جائیں، وزیراعظم

وزیراعظم شہباز شریف نے جمعرات کو متعلقہ حکام کو ہدایت کی ہے کہ مجوزہ سرکاری اداروں (ایس او ایز) کی نجکاری کے عمل میں بین الاقوامی شہرت یافتہ ماہرین کی خدمات حاصل کی جائیں ، تاکہ عمل کو شفاف، مؤثر اور قومی مفاد کے مطابق یقینی بنایا جا سکے۔

وزیراعظم آفس سے جاری بیان کے مطابق شہباز شریف نے یہ ہدایات سرکاری اداروں کی نجکاری پر پیش رفت کا جائزہ لینے کے لیے بلائے گئے اجلاس کی صدارت کرتے ہوئے دیں۔

وزیراعظم نے کہا کہ نجکاری کے دوران صرف مالی مفاد ہی نہیں بلکہ اداروں کی مستقبل کی پیشہ ورانہ صلاحیت اور قومی مفاد کو بھی پیش نظر رکھا جائے۔

انہوں نے ہدایت دی کہ حکومتی اداروں کی اندرونی صلاحیت بڑھانے کے لیے ایک جامع حکمت عملی کے تحت فوری اقدامات کیے جائیں۔

اجلاس کے دوران وزیراعظم کو بتایا گیا کہ حکومت نے جن 24 اداروں کی نجکاری کا منصوبہ بنایا ہے، ان میں سے 15 اداروں پر نجکاری کے عمل میں پیش رفت جاری ہے۔

وزیراعظم نے واضح ہدایت کی کہ غیرفعال اور خسارے میں چلنے والے سرکاری اداروں کی نجکاری ترجیحی بنیادوں پر مکمل کی جائے اور انتظامی پیچیدگیوں اور بیوروکریسی کی تاخیر سے ہر ممکن طور پر بچا جائے۔

انہوں نے خبردار کیا کہ اداروں میں تاخیر، فائلوں میں الجھاؤ اور روایتی سرخ فیتہ ہرگز برداشت نہیں کیا جائے گا۔

وزیراعظم نے کہا کہ وہ نجکاری کے عمل کی خود نگرانی کریں گے اور اس حوالے سے باقاعدہ اجلاس منعقد کیے جائیں گے ، تاکہ پیش رفت کا مسلسل جائزہ لیا جا سکے۔

اجلاس میں وفاقی وزیر برائے اقتصادی امور احد چیمہ، وزیر برائے توانائی اويس لغاری، وزیر مملکت برائے خزانہ بلال کیانی سمیت دیگر متعلقہ سرکاری حکام نے شرکت کی۔