الیکٹرک کار ساز ٹیم کی سندھ کے سینئر وزیر سے ملاقات، چارجنگ انفرااسٹرکچر پر بریفنگ

سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن سے الیکٹرک کار ساز کمپنی کے ایک وفد نے سندھ سیکریٹریٹ کراچی میں ان کے دفتر میں ملاقات کی، ملاقات کے موقع پر صوبائی وزیر برائے محنت و سماجی تحفظ سعید غنی بھی موجود تھے۔

الیکٹرک کارساز کمپنی کے وفد نے سینئر وزیر شرجیل انعام میمن اور صوبائی وزیر سعید غنی کو اپنی تیار کردہ الیکٹرک گاڑیوں (ای وی) کے ماڈلز، مقامی سطح پر اسمبلنگ اور چارجنگ انفرااسٹرکچر کے منصوبوں کے حوالے سے تفصیلی بریفنگ دی۔ ملاقات میں وفد کی جانب سے سندھ حکومت کے ساتھ شراکت داری کے امکانات پر بھی تبادلہ خیال کیا گیا۔

اس موقع پر سینئر وزیر شرجیل انعام میمن نے کہا کہ چیئرمین بلاول بھٹو زرداری اور حکومت سندھ عوام کے لیے جدید، ماحول دوست اور کم لاگت سفری سہولتیں فراہم کرنے کے لیے پُرعزم ہیں۔

ہم چاہتے ہیں کہ جلد از جلد الیکٹرک ٹیکسی سروس شروع کی جائے تاکہ شہریوں کو بہتر سفری سہولت میسر آئے، الیکٹرک گاڑیوں سے ایندھن کی بچت کے ساتھ ماحولیاتی آلودگی میں بھی کمی ہوگی۔

سینئر وزیر نے کہا کہ حکومت سندھ پبلک ٹرانسپورٹ اور دیگر شعبوں سے متعلق نجی شعبے کے ساتھ مل کر جامع منصوبہ بندی کر رہی ہے، الیکٹرک گاڑیوں کی ٹیکنالوجی نہ صرف روزگار کے نئے مواقع پیدا کرے گی بلکہ یہ صنعتی شعبے میں جدت اور سرمایہ کاری کے دروازے بھی کھولے گی۔

ان کا کہنا تھا کہ سندھ حکومت پائیدار ترقی کے ایجنڈے پر عمل پیرا ہے اور الیکٹرک وہیکلز اس سمت ایک اہم قدم ہیں۔