اپٹما کا بلند توانائی ٹیرف پر شدید تشویش کا اظہار

آل پاکستان ٹیکسٹائل ملز ایسوسی ایشن (اپٹما) نے ملک میں انتہائی بلند توانائی ٹیرف پر گہری تشویش کا اظہار کرتے ہوئے کہا ہے کہ یہ پالیسی پاکستان کی صنعتی بقا، سرمایہ کاری اور برآمدی مسابقت کو شدید نقصان پہنچا رہی ہے۔

اپٹما کے چیئرمین کامران ارشد نے لاہور میں پریس کانفرنس کے دوران کہا کہ حکومت کی یقین دہانیوں کے برعکس صنعتی بجلی ٹیرف 9 سینٹ فی یونٹ سے بڑھ کر 11.7 سینٹ ہو چکا ہے جبکہ خطے کے دیگر ممالک جیسے بھارت، بنگلہ دیش، چین اور ویتنام میں نرخ 5 سے 9 سینٹ فی یونٹ کے درمیان ہیں۔

انہوں نے کہا کہ وزارتِ توانائی کی حالیہ پالیسیاں، خاص طور پر گیس پر من مانی لیوی اور گرڈ پر منتقلی کا دباؤ، صنعت کے مسائل میں اضافہ کر رہی ہیں۔ متعدد فیکٹریاں جو ہائی ایفیشنسی کمبائنڈ ہیٹ اینڈ پاور (سی ایچ پی) سسٹم استعمال کر رہی تھیں، وہ اب یا تو بند ہو چکی ہیں یا گرڈ کی غیر مستحکم فراہمی کی وجہ سے نقصان اٹھا رہی ہیں۔

چیئرمین اپٹما نے بتایا کہ صنعتی طلب میں کمی سے پیدا ہونے والا مصنوعی آر ایل این جی سرپلس گھریلو صارفین کو 8 ڈالر فی ایم ایم بی ٹی یوکی سبسڈی پر دیا جا رہا ہے، جبکہ صنعت کو 16 ڈالر فی ایم ایم بی ٹی یو کے بھاؤ پر گیس مل رہی ہے۔ اس پالیسی سے گیس سیکٹر کا گردشی قرضہ 2.6 کھرب روپے سے تجاوز کر چکا ہے، جبکہ ایکسپلوریشن سرگرمیاں تقریباً ختم ہو چکی ہیں۔

کامران ارشد نے ایف بی آر کے غیر ضروری چھاپوں اور قانونی کاروباروں پر دباؤ کی بھی مذمت کی، مطالبہ کیا کہ ٹیکس ادارے صرف غیر دستاویزی اور نان کمپلائنٹ شعبے پر توجہ دیں۔

اپٹما رہنماؤں نے کہا کہ 130 ارب روپے سالانہ کی کراس سبسڈی صنعتی صارفین پر غیر منصفانہ بوجھ ہے، جس سے برآمدات جمود کا شکار اور سرمایہ کاری کم ہو گئی ہے۔

چیئرمین نارتھ اسد شفیع نے کہا کہ سی ٹی بی سی ایم ماڈل عملی طور پر غیر مؤثر ہے کیونکہ 12.55 روپے فی یونٹ وہیلنگ چارج کے باعث دوطرفہ بجلی خریدنا مالی طور پر ممکن نہیں۔

اپٹما نے حکومت سے مطالبہ کیا کہ وہ اپنے وعدے کے مطابق علاقائی طور پر مسابقتی توانائی نرخ بحال کرے تاکہ برآمدات، روزگار اور محصولات میں اضافہ ممکن ہو۔ تنظیم کے مطابق، اگر توانائی کے نرخ خطے کے مطابق کیے جائیں تو ٹیکسٹائل شعبہ 25 ارب ڈالر سالانہ برآمدات کی صلاحیت رکھتا ہے، جو پائیدار معاشی ترقی کے لیے ناگزیر ہے۔

کاپی رائٹ بزنس ریکارڈر، 2025