سرکولر ڈیٹ پلان: اوجی ڈی سی کو 7.73 ارب روپے کی تیسری سودی قسط موصول

پاکستان کی سب سے بڑی تیل و گیس کی تلاش اور پیداوار کرنے والی کمپنی، آئل اینڈ گیس ڈیولپمنٹ کمپنی لمیٹڈ (او جی ڈی سی ایل) نے حکومتی سرکولر ڈیٹ سیٹلمنٹ پلان کے تحت پاور ہولڈنگ (پرائیویٹ) لمیٹڈ (پی ایچ ایل) سے 7.73 ارب روپے کی تیسری سودی قسط وصول کرلی ہے۔

کمپنی نے منگل کو پاکستان اسٹاک ایکسچینج کو بھیجے گئے نوٹس میں اس پیش رفت کا اعلان کیا۔ نوٹس کے مطابق یہ قسط کل 12 ماہانہ مساوی اقساط میں سے ایک ہے اور حکومت پاکستان کے منظور شدہ میکانزم کے تحت سود کی ادائیگی کے طور پر موصول ہوئی ہے۔

نوٹس میں مزید کہا گیا کہ کل سود کی رقم 92 ارب روپے ہے، جو جولائی 2025 سے شروع ہونے والی 12 ماہانہ اقساط میں ادا کی جائے گی۔ او جی ڈی سی ایل کے مطابق، اس قسط کی وصولی توانائی شعبے میں سرکولر ڈیٹ کے حل کے لیے جاری حکومتی کوششوں کی مسلسل پیش رفت کی عکاسی کرتی ہے۔

یاد رہے کہ گزشتہ ماہ بھی او جی ڈی سی ایل نے پی ایچ ایل سے اپنی دوسری سودی قسط 7.73 ارب روپے کی وصول کی تھی۔

گزشتہ سال جون میں حکومت نے سرکولر ڈیٹ سیٹلمنٹ پلان کے تحت او جی ڈی سی ایل کو 82 ارب روپے کی اصل سرمایہ کاری کی ادائیگی کی منظوری دی تھی، جو پی ایچ ایل کے پرائیویٹ پلیسڈ ٹرم فنانس سرٹیفیکیٹس میں کمپنی کی سرمایہ کاری کی نمائندگی کرتی ہے۔ ساتھ ہی سود کی ادائیگی 92 ارب روپے کی بھی منظوری دی گئی تھی، جو جولائی 2025 سے بارہ مساوی ماہانہ اقساط میں کی جائے گی۔

سرکولر ڈیٹ سیٹلمنٹ کے تحت او جی ڈی سی ایل نے حکومت کی ہدایات پر 72 ارب روپے کی لیکویڈیٹڈ ڈیمجز (تاخیر یا نقصان کے جرمانے) کی مد میں واجبات معاف کرنے پر بھی رضامندی ظاہر کی۔

او جی ڈی سی ایل کی بنیاد 23 اکتوبر 1997 کو کمپنیز آرڈیننس، 1984 (اب کمپنیز ایکٹ، 2017) کے تحت رکھی گئی۔ کمپنی تیل اور گیس کے وسائل کی کھوج اور ترقی کے لیے قائم کی گئی جس میں تیل اور گیس کی پیداوار اور فروخت سمیت دیگر متعلقہ سرگرمیاں شامل ہیں، جو پہلے آئل اینڈ گیس ڈیولپمنٹ کارپوریشن کے ذریعے انجام دی جاتی تھیں، جس کی بنیاد 1961 میں رکھی گئی تھی۔