وزیراعظم شہباز شریف کا سعودی ولی عہد کے وژن کو خراجِ تحسین

سعودی ولی عہد اور وزیرِاعظم محمد بن سلمان کے امتِ مسلمہ کے لیے وژن کو سراہتے ہوئے وزیرِاعظم شہباز شریف نے جمعرات کے روز کہا کہ اپنے سعودی ہم منصب کی جانب سے دورۂ ریاض کے موقع پر ملنے والے پرخلوص اور بے مثال استقبال سے وہ انتہائی متاثر ہوئے ہیں۔

انہوں نے کہا کہ شاہی سعودی فضائیہ کے طیاروں کی جانب سے ان کے جہاز کو ایئرپورٹ تک پہنچانے کے لیے دی گئی ایئر اسکارٹ اور پُروقار گارڈ آف آنر نے اس حقیقت کو اجاگر کیا کہ پاکستان اور سعودی عرب کے مابین قائم و دائم محبت اور باہمی احترام موجود ہے۔

یہ بیان ایک روز بعد سامنے آیا جب شہباز شریف کے دورۂ ریاض کے دوران سعودی عرب اور پاکستان کے درمیان “اسٹریٹجک میوچوئل ڈیفنس ایگریمنٹ (ایس ایم ڈی اے) پر دستخط کیے گئے۔

شہزادہ محمد بن سلمان اور وزیرِاعظم شہباز شریف نے اس معاہدے پر دستخط کیے، جس میں واضح طور پر کہا گیا ہے کہ کسی بھی ملک پر ہونے والی جارحیت دونوں پر جارحیت تصور ہوگی۔

بیان کے مطابق یہ معاہدہ دونوں ممالک کی جانب سے سلامتی میں اضافے اور خطے و دنیا میں امن قائم رکھنے کے عزم کا مظہر ہے۔ اس کا مقصد دفاعی تعاون کے مختلف پہلوؤں کو فروغ دینا اور کسی بھی جارحیت کے خلاف مشترکہ دفاع کو مزید مضبوط بنانا ہے۔

یہ اہم پیش رفت اس واقعے کے ایک ہفتے بعد ہوئی جب اسرائیل نے قطر پر حملہ کیا، جو بین الاقوامی قوانین اور علاقائی سالمیت کی کھلی خلاف ورزی تھی۔ اس کے بعد رواں ہفتے کے اوائل میں دوحہ، قطر میں ایک ہنگامی عرب-مسلم سربراہی اجلاس منعقد ہوا، جہاں مسلم دنیا نے اسرائیلی جارحیت کی مذمت کی اور بعض ممالک نے جوابی کارروائی کی تجویز بھی دی۔

وزیرِاعظم شہباز شریف نے بتایا کہ ان کی ولی عہد شہزادہ محمد بن سلمان سے خوشگوار ملاقات میں خطے کے چیلنجز اور دو طرفہ تعاون کے فروغ سمیت مختلف امور پر بات ہوئی۔

انہوں نے شہزادہ سلمان کی مسلم دنیا کے لیے وژن اور قیادت کو خراجِ تحسین پیش کیا اور پاکستان میں سعودی سرمایہ کاری، تجارت اور کاروباری تعلقات کو بڑھانے میں ان کی دلچسپی کو سراہا۔

وزیراعظم نے اُمید ظاہر کی کہ پاکستان اور سعودی عرب کی دوستی مزید پروان چڑھے گی اور نئی بلندیوں کو چھوئے گی۔

ریاض کے نائب گورنر محمد بن عبدالرحمن بن عبدالعزیز نے 18 ستمبر 2025 کو وزیراعظم محمد شہباز شریف کو ریاض ایئرپورٹ سے رخصت کیا۔ وزیرِاعظم بدھ کے روز ولی عہد شہزادہ محمد بن سلمان کی دعوت پر سعودی عرب کے سرکاری دورے پر پہنچے تھے۔