نیشنل سیونگز اسکیمز، سی ڈی این ایس نے منافع کی شرحوں میں ردوبدل کردیا

عارف حبیب لمیٹڈ (اے ایچ ایل) ریسرچ کے مرتب کردہ اعداد و شمار کے مطابق سنٹرل ڈائریکٹوریٹ آف نیشنل سیونگز(سی ڈی این ایس) نے اپنی نیشنل سیونگز اسکیمز (این ایس ایس) پر منافع کی شرحوں میں ترمیم کی ہے، جو 17 ستمبر 2025 سے مؤثر ہوں گی۔

شارٹ ٹرم سیونگز سرٹیفکیٹس پر شرحِ منافع میں 6 بیسس پوائنٹس (بی پی ایس) کا اضافہ کیا گیا ہے، جو پہلے 10.36 فیصد تھی اور اب بڑھ کر 10.42 فیصد ہوگئی ہے۔ اسی طرح، سروا اسلامک سیونگ اکاؤنٹ اور سروا اسلامک ٹرم اکاؤنٹ پر منافع کی شرح میں 42 بیسس پوائنٹس کا اضافہ کیا گیا ہے، جس کے بعد دونوں اسکیمیں فی سال 9.92 فیصد کا منافع دے رہی ہیں، جبکہ اس سے قبل یہ 9.50 فیصد تھا۔

اس کے برعکس، ڈیفنس سیونگز سرٹیفکیٹس پر منافع کی شرح میں 12 بیسس پوائنٹس کی کمی کی گئی ہے، جو پہلے 11.54 فیصد تھی اور اب گھٹ کر 11.42 فیصد ہوگئی ہے۔

ماہرین کے مطابق یہ تبدیلیاں اسٹیٹ بینک آف پاکستان کے حالیہ مانیٹری پالیسی کے فیصلے کے بعد پیدا ہونے والے بدلتے ہوئے شرحِ سود کے ماحول کی عکاسی کرتی ہیں، جس میں مرکزی بینک نے پالیسی ریٹ کو 11 فیصد پر برقرار رکھنے کا اعلان کیا تھا۔

چند روز قبل، اسٹیٹ بینک آف پاکستان کی مانیٹری پالیسی کمیٹی (ایم پی سی) نے پالیسی ریٹ کو 11 فیصد پر برقرار رکھنے کا فیصلہ کیا تھا، یہ دلیل دیتے ہوئے کہ حالیہ سیلاب کے معیشت پر قلیل المدتی منفی اثرات مرتب ہوئے ہیں۔

نیشنل سیونگز آرگنائزیشن پاکستان کا سب سے بڑا مالیاتی ادارہ ہے، جو 3.4 کھرب روپے سے زائد کا پورٹ فولیو منظم کرتا ہے اور ملک بھر میں 376 برانچوں کے نیٹ ورک کے ذریعے 40 لاکھ سے زیادہ صارفین کو خدمات فراہم کرتا ہے، جسے 12 ریجنل ڈائریکٹوریٹس کے تحت چلایا جاتا ہے۔

سی ڈی این ایس حکومت کو بجٹ خسارے کے مالیاتی انتظام میں مدد فراہم کرتا ہے اور اہم انفراسٹرکچر منصوبوں کی معاونت کرتا ہے۔