ورلڈ بینک کی پنجاب میں پرائمری تعلیم کیلئے 4 کروڑ 79 لاکھ ڈالر کی گرانٹ

ورلڈ بینک نے پنجاب میں لڑکیوں اور لڑکوں کی پری اور پرائمری سطح پر تعلیم کو بہتر بنانے کیلئے 4 کروڑ 79 لاکھ ڈالر کے گرانٹ کی منظوری دے دی ہے جو گلوبل پارٹنرشپ فار ایجوکیشن فنڈ سے فراہم کیا جائے گا۔

منصوبے کے تحت ابتدائی تعلیم کو فروغ دیا جائے گا اور ایلیمنٹری سطح پر طلبہ کے لیے تعلیمی معاونت کو مضبوط کرنے کے لیے استعمال کیا جائے گا۔

بیان کے مطابق گیٹنگ رزلٹس: پنجاب میں معیاری تعلیمی خدمات تک رسائی اور نظام کی تبدیلی کا منصوبہ ابتدائی تعلیم کو فروغ دے گا، اسکول سے باہر بچوں کو دوبارہ داخل کرے گا، اساتذہ کی معاونت کو مضبوط کرے گا اور تعلیم کے شعبے کی ماحولیاتی تبدیلی اور ہنگامی صورتحال کے لیے مؤثر ردعمل کی صلاحیت کو بہتر بنائے گا۔

یہ منصوبہ خاص طور پر غربت زدہ اور سب سے زیادہ کمزور آبادی کی ضروریات کو مدنظر رکھتا ہے، جو عالمی بینک گروپ کے دوہرے اہداف انتہائی غربت کے خاتمے اور مشترکہ خوشحالی کے فروغ اور پاکستان کے ساتھ اس کے کنٹری پارٹنرشپ فریم ورک (سی پی ایف) سے ہم آہنگ ہے۔

ورلڈ بینک کی ٹاسک ٹیم لیڈر عزا فرخ نے کہا کہ یہ منصوبہ بنیادی تعلیمی صلاحیت کو مضبوط بنا کر، نظامی استعداد کو بڑھا کر اور رویوں میں مثبت تبدیلی کو فروغ دے کر صوبے میں طویل المدتی انسانی سرمائے کی ترقی اور معاشی نمو کی حمایت کرے گا۔

منصوبے کا ہدف 40 لاکھ سے زائد بچوں کو فائدہ پہنچانا ہے جن میں 80 ہزار اسکول سے باہر بچے، محکمہ تعلیمِ اسکول کے 30 لاکھ سے زیادہ بچے، غیر رسمی شعبے کے تقریباً 8 لاکھ 50 ہزار بچے اور محکمہ خصوصی تعلیم کے 1 لاکھ 40 ہزار خصوصی ضروریات کے حامل بچے شامل ہیں۔

مزید برآں ایک لاکھ سے زائد اساتذہ، اسکول رہنما، والدین اور کمیونٹی کے افراد پیشہ ورانہ تربیت اور آگاہی مہمات سے مستفید ہوں گے۔ بالواسطہ فائدہ اٹھانے والوں میں محکمہ تعلیمِ اسکول، محکمہ خصوصی تعلیم اور غیر رسمی اسکولوں کے تمام طلبہ شامل ہیں جو نظامی اصلاحات سے فیضیاب ہوں گے۔

عزا فرخ نے مزید کہا کہ یہ منصوبہ حکومتِ پنجاب کے وسیع تر تعلیمی اصلاحاتی ایجنڈے کے ساتھ ہم آہنگ ہے جس کا مقصد ایک مؤثر، جوابدہ اور شمولیتی تعلیمی نظام قائم کرنا ہے۔

انہوں نے مزید کہا کہ یہ منصوبہ حکومت کی کوششوں کی حمایت کرے گا تاکہ تعلیمی شعبے میں حکمرانی، انتظام اور استعداد کو بہتر بنایا جا سکے۔ اس میں اسکول، محکمہ خصوصی تعلیم اور غیر رسمی شعبوں کے درمیان ہم آہنگی کو مضبوط بنانا، اسکولوں کو بااختیار بنانا اور کمیونٹی کے ساتھ شراکت داری قائم کر کے پائیدار نتائج کو یقینی بنانا شامل ہے۔