پاکستانی برآمد کنندگان کا امریکی ٹیرف میں کمی سے فائدہ اٹھانے کیلئے معاون پالیسی پر زور

امریکی ٹیرف میں 29 فیصد سے 19 فیصد کی نمایاں کمی کے بعد پاکستانی برآمد کنندگان نے حکومت پر زور دیا ہے کہ وہ پالیسی میں مستقل مزاجی، مسابقتی پیداواری لاگت اور خام مال تک آسان رسائی کو یقینی بنائے تاکہ امریکی مارکیٹ میں ملک کی برآمدی صلاحیت کو زیادہ سے زیادہ استعمال کیا جا سکے۔

منگل کو وزارتِ تجارت کی جانب سے جاری بیان کے مطابق، یہ پیشرفت امریکی باہمی ٹیرف سے متعلق ایک اجلاس کے دوران ہوئی جس کی صدارت وفاقی وزیر برائے تجارت جام کمال خان نے کی۔

اجلاس میں وزیراعظم کے مشیر برائے صنعت و پیداوار ہارون اختر خان، وزیراعظم کے کوآرڈینیٹر برائے تجارت رانا احسان افضل، سیکریٹری تجارت جواد پال، وزارتِ تجارت اور وزارتِ صنعت و پیداوار کے سینئر افسران، اور ملبوسات و ٹیکسٹائل، چاول، نمک، سرجیکل سامان، اسپورٹس اشیا، الیکٹرانکس، خوراک و زراعت، چمڑا اور دیگر شعبوں سے تعلق رکھنے والے 30 سے زائد بڑے برآمد کنندگان اور ایس ایم ایز شریک ہوئے۔

اجلاس میں صنعتکاروں نے حکومت کو اپنے علاقائی حریفوں پر حالیہ برسوں میں حاصل ہونے والی پاکستان کی سب سے بڑی اسٹریٹجک تجارتی کامیابیوں میں سے ایک پر مبارکباد دی۔

تاہم، صنعتی نمائندوں نے اس بات پر زور دیا کہ حکومت موافق اور پیش گوئی کے قابل پالیسی سپورٹ فراہم کرے تاکہ پیداواری لاگت کو بہتر بنایا جا سکے اور خام مال تک رسائی ممکن ہو، تاکہ آئندہ کے تجارتی مواقع سے بھرپور فائدہ اٹھایا جا سکے۔

وفاقی وزیر تجارت نے برآمدات پر مبنی پالیسیوں کے لیے حکومت کے عزم کا اعادہ کیا، جس میں فوری معاونت کے اقدامات اور پائیدار طویل مدتی حکمتِ عملیاں شامل ہیں۔

انہوں نے اس بات پر زور دیا کہ بہتر تعاون اور فیصلہ کن اقدامات کے ذریعے پاکستان کی برآمدی صنعتیں نمایاں ترقی حاصل کر سکتی ہیں۔

انہوں نے کہا کہ برآمد کنندگان کی تمام سفارشات وزیراعظم کو منظوری کے لیے پیش کی جائیں گی۔

جام کمال نے اجلاس میں کہا کہ ٹیرف میں کمی سے پیدا ہونے والے مواقع پر برآمد کنندگان کی آرا کی روشنی میں آئندہ کا لائحہ عمل طے کرنا ضروری ہے تاکہ اس موقع سے بھرپور فائدہ اٹھایا جا سکے اور برآمدات میں اضافہ کیا جا سکے۔

دریں اثنا، مشیر خصوصی ہارون اختر نے پاکستان کی علاقائی برتری کو اجاگر کرتے ہوئے کہا کہ حکومت اس صنعت کو موجودہ حالات سے پیدا ہونے والے کاروباری مواقع سے فائدہ اٹھانے کے لیے زیادہ سے زیادہ معاونت فراہم کرنے کے لیے پرعزم ہے۔