امریکی ڈالر کے مقابلے میں روپے کی قدر میں معمولی بہتری

امریکی ڈالر کے مقابلے میں پاکستانی روپے کی قدر میں بہتری کا سلسلہ منگل کو بھی جاری رہا جبکہ انٹر بینک مارکیٹ میں روپے کی قدر میں 0.01 فیصد اضافہ ریکارڈ کیا گیا۔

کاروباری دن کے اختتام پر ڈالر کے مقابلے روپیہ 282.42 روپے پر بند ہوا، جو کہ 3 پیسے کے معمولی اضافے کو ظاہر کرتا ہے۔

گزشتہ روز پیر کو انٹر بینک مارکیٹ میں ڈالر کے مقابلے میں روپیہ 282.45 پر بند ہوا تھا۔

بین الاقوامی سطح پر، امریکی ڈالر منگل کو مستحکم رہا کیونکہ مارکیٹیں ایک اہم صارفین کے افراطِ زر کی رپورٹ کے منتظر ہیں، جو کہ امریکی فیڈرل ریزرو کے سود کی شرحوں میں کمی کی توقعات کو تشکیل دے سکتی ہے۔

آسٹریلین ڈالر بھی ریزرو بینک آف آسٹریلیا کے پالیسی فیصلے سے چند گھنٹے قبل مستحکم رہا۔

امریکی ڈالر انڈیکس، جو یورو اور ین سمیت چھ کرنسیوں کے مقابلے میں ڈالر کی قدر کو ماپتا ہے — 98.497 پر مستحکم رہا، جبکہ گزشتہ دو سیشنز میں 0.5 فیصد بڑھ چکا ہے۔ اس سے قبل، ڈالر میں کمی اس وقت آئی جب امریکی صدر ڈونلڈ ٹرمپ نے فیڈ گورنر کے متبادل کے طور پر ایک نرم مؤقف رکھنے والے امیدوار کو نامزد کیا، اور چیئرمین کے لیے بھی اسی طرز کے ممکنہ امیدواروں پر غور کیا گیا، جس سے تاجروں نے شرح میں کمی کے امکانات بڑھا دیے۔

مزید یہ کہ فیڈ حکام لیبر مارکیٹ کے بارے میں بڑھتی ہوئی تشویش کا اظہار کر رہے ہیں اور اس حوالے سے ستمبر تک ممکنہ اقدام کے اشارے دے رہے ہیں۔

مہنگائی میں کمی اگلے ماہ شرح میں کمی کی توقعات کو مضبوط کر سکتی ہے، لیکن اگر اس بات کے شواہد ملے کہ ٹرمپ کے ٹیرف قیمتوں پر دباؤ ڈال رہے ہیں تو اس سے مرکزی بینک کو فی الحال کوئی قدم اٹھانے سے روکا جا سکتا ہے۔

تاجر اس وقت 17 ستمبر کو ایک چوتھائی پوائنٹ کمی کے امکانات کو تقریباً 89 فیصد قرار دے رہے ہیں۔ منگل کو امریکی ڈالر 0.1 فیصد بڑھ کر 148.28 ین پر پہنچ گیا۔ یورو 1.1615 ڈالر پر مستحکم رہا۔

تیل کی قیمتیں، جو کرنسی کے توازن کا ایک اہم اشارہ ہیں، منگل کو اس وقت بڑھ گئیں جب امریکہ اور چین نے زیادہ ٹیرف لگانے پر عارضی طور پر توقف کو بڑھا دیا، جس سے یہ خدشہ کم ہوا کہ تجارتی جنگ کی شدت ان کی معیشتوں کو متاثر کرے گی اور دنیا کے دو سب سے بڑے تیل استعمال کرنے والے ممالک میں طلب کو کم کرے گی۔

برینٹ کروڈ کے اکتوبر کے سودے 26 سینٹ یا 0.39 فیصد بڑھ کر فی بیرل 66.89 ڈالر تک پہنچ گئے، جبکہ امریکی ویسٹ ٹیکساس انٹرمیڈیٹ کروڈ کے سودے 22 سینٹ یا 0.34 فیصد بڑھ کر 64.18 ڈالر فی بیرل تک پہنچ گئے۔