سونے کی فی تولہ قیمت میں 2,300 روپے کی کمی

عالمی مارکیٹ میں جمعہ کے روز سونے کی قیمتوں میں کمی کے تناظر میں مقامی صرافہ بازار میں بھی فی تولہ سونا 2,300 روپے سستا ہو کر 3 لاکھ 56 ہزار 700 روپے پر آ گیا۔

آل پاکستان جیمز اینڈ جیولرز صرافہ ایسوسی ایشن (اے پی جی جے ایس اے) کے جاری کردہ اعداد و شمار کے مطابق فی 10 گرام سونا 1,972 روپے کمی کے بعد 3 لاکھ 5 ہزار 812 روپے میں فروخت ہوا۔

جمعرات کے روز بھی سونے کی قیمت میں نمایاں کمی دیکھی گئی تھی، جب فی تولہ سونا 5,900 روپے سستا ہو کر 3 لاکھ 59 ہزار روپے پر آ گیا تھا۔

عالمی مارکیٹ میں بھی جمعہ کے روز سونے کی قیمت میں کمی ریکارڈ کی گئی۔ اے پی جی جے ایس اے کے مطابق عالمی مارکیٹ میں فی اونس سونے کی قیمت 23 ڈالر کمی کے ساتھ 3,340 ڈالر (20 ڈالر پریمیم سمیت) پر پہنچ گئی۔

دوسری جانب چاندی کی قیمت میں بھی کمی ہوئی اور فی تولہ چاندی 34 روپے کمی کے بعد 4,023 روپے میں فروخت ہوئی۔