کراچی میں کل سے بارشوں کا امکان

کراچی میں 19 جولائی کو گرج چمک کے ساتھ بارش کا امکان ہے کیونکہ مون سون ہوائیں سندھ کے بیشتر حصوں میں داخل ہو رہی ہیں، جس سے مختلف اضلاع میں بارشوں کے امکانات بڑھ گئے ہیں۔

محکمہ موسمیات نے جمعرات کو بتایا کہ کراچی کو اس سال کی پہلی مون سون بارش 26 جون کو ملی تھی، جب شہر کے مختلف علاقوں میں درمیانی سے تیز بارشیں ہوئیں۔ ان علاقوں میں کاٹھور، گڈاپ، گلشنِ حدید، ملیر، سفورا، سعدی ٹاؤن، ماڈل کالونی، آئی آئی چندریگر روڈ، طارق روڈ، ڈیفنس ہاؤسنگ اتھارٹی (ڈی ایچ اے)، اسکیم 33، نارتھ ناظم آباد اور دیگر شامل ہیں، جہاں بھاری بارش ہوئی۔

مزید برآں، محکمہ موسمیات کے مطابق کراچی میں درجہ حرارت ہفتہ تک 28 سے 36 ڈگری سینٹی گریڈ کے درمیان رہنے کا امکان ہے۔

دوسری جانب پاکستان محکمہ موسمیات (پی ایم ڈی) نے کہا کہ گزشتہ روز دادو اور قمبر شہدادکوٹ اضلاع میں بھی گرج چمک کے ساتھ بارش ہوئی ہے۔ جمعہ کو تھرپارکر، عمرکوٹ، میرپورخاص، ٹھٹھہ، سجاول اور بدین اضلاع میں بھی ایسے ہی موسمی حالات متوقع ہیں۔

آنے والے دنوں کی پیشگوئی کے مطابق ہفتہ کو بھی تھرپارکر، عمرکوٹ، میرپورخاص، حیدرآباد، ٹنڈو محمد خان، سانگھڑ، بدین، ٹھٹھہ اور سجاول اضلاع میں گرج چمک کے ساتھ ہلکی سے درمیانی اور چند مقامات پر تیز بارش کے امکانات ہیں۔

صوبے بھر کے رہائشیوں کو مشورہ دیا گیا ہے کہ موسم سے متعلق باخبر رہیں اور ضروری احتیاطی تدابیر اختیار کریں۔

پی ایم ڈی نے مقامی انتظامیہ سے درخواست کی ہے کہ تمام ضروری حفاظتی اقدامات اٹھائے جائیں۔ محکمہ موسمیات نے کہا کہ تمام متعلقہ حکام کو ہدایت دی جاتی ہے کہ وہ ’الرٹ‘ رہیں اور کسی بھی ناخوشگوار صورتحال سے بچنے کے لیے اقدامات کریں۔

یہ بات قابلِ ذکر ہے کہ پاکستان بھر میں موسلا دھار بارشوں نے بڑے پیمانے پر تباہی مچائی ہے، این ڈی ایم اے کے مطابق 26 جون سے اب تک 178 افراد جاں بحق اور 491 زخمی ہو چکے ہیں، جبکہ ملک کے مختلف حصوں میں شہری سیلاب کا خدشہ ظاہر کیا گیا ہے۔

این ڈی ایم اے کے تازہ اعداد و شمار کے مطابق گزشتہ 24 گھنٹوں میں بارش سے متعلقہ واقعات میں 54 اموات اور 227 زخمی ہوئے ہیں۔ انسانی جانوں کے ضیاع کے علاوہ 678 مکانات کو نقصان پہنچا اور 126 مویشی ہلاک ہوئے۔

26 جون سے اب تک صوبہ وار اموات کی تفصیل درج ذیل ہے: پنجاب میں 103 اموات، خیبر پختونخوا میں 38، سندھ میں 20، بلوچستان میں 16 اور آزاد جموں و کشمیر (اے جے کے) میں 1 ہلاکت رپورٹ ہوئی۔

این ڈی ایم اے نے تصدیق کی ہے کہ تمام رپورٹ شدہ واقعات جاری موسلا دھار بارشوں کا براہ راست نتیجہ ہیں۔ حکام صورتحال پر کڑی نظر رکھے ہوئے ہیں اور متاثرہ علاقوں میں ریلیف آپریشنز کو مربوط کر رہے ہیں۔