وفاقی وزیر خزانہ و محصولات سینیٹر محمد اورنگزیب نے پاکستان بزنس کونسل (پی بی سی) کے ساتھ ملاقات میں مشاورتی پالیسی فریم ورک کے لیے حکومت کے عزم کا اعادہ کیا ہے۔
بدھ کے روز وزیر خزانہ محمد اورنگزیب کی زیر صدارت پاکستان بزنس کونسل کے وفد سے ملاقات ہوئی، جس کی قیادت کونسل کے سبکدوش ہونے والے سی ای او احسان ملک اور نئے سی ای او جاوید قریشی نے کی۔ ملاقات وزارتِ خزانہ میں منعقد ہوئی۔
وزیر خزانہ نے پی بی سی میں قیادت کی منتقلی کا خیرمقدم کیا اور نئے آنے والے وفد کو اپنی مکمل حمایت کا یقین دلایا۔ انہوں نے کاروباری برادری کے اہم اسٹیک ہولڈرز کے ساتھ جامع اور مسلسل مشاورت کے عمل کو برقرار رکھنے کے لیے حکومت کے عزم کی توثیق کی۔
ملاقات کے دوران وزیر خزانہ نے پاکستان بزنس کونسل کے تعمیری کردار کو سراہا، خاص طور پر اس کی پالیسی تجاویز، تحقیقی کام اور مختلف شعبہ جات سے متعلق ڈیٹا کی فراہمی کو قدر کی نگاہ سے دیکھا۔ انہوں نے اس بات پر زور دیا کہ شواہد پر مبنی پالیسی سازی نہایت اہم ہے۔
وزیر خزانہ نے وفد کو آگاہ کیا کہ ٹیکس پالیسی آفس کو فیڈرل بورڈ آف ریونیو (ایف بی ار) سے وزارتِ خزانہ منتقل کر دیا گیا ہے، تاکہ ٹیکس پالیسی کی تشکیل کو ادارہ جاتی بنیادوں پر منظم کیا جا سکے اور پی بی سی جیسے فورمز کے ساتھ روابط کو مزید مضبوط کیا جا سکے۔
سینیٹر اورنگزیب نے اس بات پر زور دیا کہ حکومت کاروباری و صنعتی طبقے کی رائے اور تجاویز کو بے حد اہمیت دیتی ہے۔ اسی حکمت عملی کے تحت وفاقی بجٹ 26-2025 کے لیے مشاورتی عمل کا آغاز اس سال معمول سے پہلے کیا گیا، تاکہ مشاورت، غور و فکر، اور ایوانِ صنعت و تجارت، ٹریڈ باڈیز اور بزنس فورمز سے موصول ہونے والی سفارشات کو بجٹ سازی کے عمل میں مؤثر طریقے سے شامل کیا جا سکے۔
کاپی رائٹ بزنس ریکارڈر، 2025
Comments
Comments are closed.