ٹرمپ ایران کے ساتھ سفارتی معاملات میں ’ابھی بھی دلچسپی‘ رکھتے ہیں، وائٹ ہاؤس

ڈونلڈ ٹرمپ کا خیال ہے کہ اگر ایران اپنی جوہری پروگرام پر مذاکرات سے انکار کرے تو ایرانی عوام کو چاہیے کہ وہ اپنی حکومت کا تختہ الٹ دیں، لیکن وائٹ ہاؤس نے پیر کو کہا ہے کہ امریکی صدر ”ابھی بھی“ سفارت کاری میں دلچسپی رکھتے ہیں۔

امریکا کی پریس سیکرٹری کیرولین لیوٹ نے فاکس نیوز پر کہا کہ اگر ایرانی حکومت پرامن سفارتی حل پر آمادہ نہیں ہوتی، جس میں صدر اب بھی دلچسپی رکھتے اور مصروف ہیں، تو ایرانی عوام کو چاہیے کہ اس انتہائی ظالم حکومت کی طاقت چھین لیں جو دہائیوں سے انہیں دبائے ہوئے ہے۔

امریکی بمباروں نے گزشتہ ہفتے کے اختتام پر ایران کے انتہائی محفوظ اور خفیہ جوہری افزودگی مراکز پر حملے کیے، اسرائیل کی عسکری مہم میں شامل ہو کر ایرانی جوہری پروگرام کو تباہ کرنے کی کوشش کی ہے۔

امریکی اعلیٰ عہدیداروں نے بار ہا اصرار کیا ہے کہ امریکہ کا مقصد ایران میں نظام کی تبدیلی نہیں ہے لیکن ٹرمپ نے اتوار کو ایک سوشل میڈیا پوسٹ کے ذریعے اس پیغام سے انحراف کیا ہے جس میں انہوں نے کہا کہ نظام کی تبدیلی کیوں نہیں ہونی چاہیے؟؟؟

وائٹ ہاؤس کے مطابق یہ خطرناک بمباری کی مہم مکمل کامیابی تھی، اور ٹرمپ نے ایک اور پوسٹ میں کہا ہے کہ ان مقامات کو ”زبردست نقصان پہنچایا گیا ہے“۔ تاہم ایران کے جوہری پروگرام کو کتنا نقصان پہنچا ہے، اس کی آزادانہ تصدیق نہیں ہوئی۔

اسرائیل، امریکہ اور دیگر مغربی طاقتیں ایران پر الزام لگاتی ہیں کہ وہ جوہری ہتھیار بنانے کی کوشش کر رہا ہے جبکہ تہران نے ہمیشہ اسے مسترد کیا ہے اور کہا ہے کہ ان کا پروگرام صرف شہری بجلی کے لیے ہے۔