اینٹی منی لانڈرنگ ایکٹ: وزیر خزانہ کا ایف بی آر کو حاصل اختیارات پر نظرثانی کا اعلان

وفاقی وزیر خزانہ محمد اورنگزیب نے ہفتہ کے روز کہا کہ کاروباری طبقے کو اینٹی منی لانڈرنگ ایکٹ (اے ایم ایل اے) کے تحت نوٹسز جاری کرنا ایک نہایت سنجیدہ معاملہ ہے اور حکومت فیڈرل بورڈ آف ریونیو (ایف بی آر) کو حاصل اینٹی منی لانڈرنگ کے اختیارات کا ازسرِنو جائزہ لے گی۔

یہ بات سینیٹ کی قائمہ کمیٹی برائے خزانہ کے اجلاس میں کہی گئی جہاں مالی سال 26-2025 کے لیے فنانس بل کا جائزہ لیا جا رہا تھا۔ اجلاس کے دوران کمیٹی کے چیئرمین سینیٹر سلیم مانڈوی والا نے ایف بی آر کی جانب سے ٹیکس دہندگان کو اینٹی منی لانڈرنگ ایکٹ کے تحت نوٹسز جاری کرنے کے معاملے کو اٹھایا۔

یہ مسئلہ اس وقت سامنے آیا جب ایف بی آر کے ممبر کسٹمز (پالیسی) نے فنانس بل 26-2025 کے تحت مجوزہ ”ڈائریکٹوریٹ جنرل آف انٹیلیجنس اینڈ رسک مینجمنٹ کسٹمز“ کے قیام کی وضاحت کی۔ اس نئے ادارے کو اینٹی منی لانڈرنگ ایکٹ کے تحت کارروائی کے اختیارات حاصل ہوں گے۔

سینیٹر سلیم مانڈوی والا نے اس پر سخت تشویش کا اظہار کیا کہ اس ادارے کو ٹیکس دہندگان کے خلاف اینٹی منی لانڈرنگ قانون کے تحت کارروائی کے اختیارات دیے جا رہے ہیں۔ انہوں نے کہا، ہمیں کاروباری برادری کو اینٹی منی لانڈرنگ ایکٹ کے تحت غیر قانونی نوٹسز جاری کیے جانے کی کئی شکایات موصول ہوئی ہیں۔“

انہوں نے مزید کہا کہ ماضی میں جاری کیے گئے تمام ایسے نوٹسز سینیٹ کی قائمہ کمیٹی کی مداخلت پر واپس لے لیے گئے تھے، اور یہ اختیارات ایف بی آر کے افسران کو نہیں دیے جانے چاہئیں کیونکہ ماضی میں ان کا غلط استعمال ہو چکا ہے۔

وزیر خزانہ نے کمیٹی کو یقین دلایا کہ حکومت اس معاملے کا بغور جائزہ لے گی اور اینٹی منی لانڈرنگ قانون کے تحت ایف بی آر کو حاصل اختیارات کا تفصیلی معائنہ کیا جائے گا۔

ایک اہم پیش رفت میں کمیٹی نے کسٹمز ایکٹ 1969 میں بڑی ترامیم کی منظوری دی، جن کا مقصد چیسس نمبر میں چھیڑ چھاڑ یا ٹیمپرنگ والے گاڑیوں کے مسئلے کو حل کرنا ہے۔ نئے قانون کے تحت، اگر کسی گاڑی کا چیسس نمبر ٹیمپر شدہ، کٹ اینڈ ویلڈ، یا دوبارہ مہر شدہ پایا گیا تو ایسی گاڑی کو اسمگل شدہ تصور کیا جائے گا، چاہے وہ کسی موٹر رجسٹریشن اتھارٹی کے پاس رجسٹرڈ ہو۔

ایف بی آر کے چیئرمین راشد محمود لنگڑیال نے وضاحت کی کہ ایسی گاڑیوں کو ضبط کرکے تباہ کر دیا جائے گا، انہیں دوبارہ نیلام نہیں کیا جائے گا۔ انہوں نے کہا کہ اصولی طور پر ایسی گاڑیوں کو آگ لگا دینی چاہیے تاکہ ان کے پرزوں کی دوبارہ فروخت نہ ہو۔

قائمہ کمیٹی نے سفارش کی کہ ایسی گاڑیوں کی ضبطی اور تباہی کی کارروائی ضبطی کے 30 دن کے اندر مکمل ہونی چاہیے۔

راشد محمود لنگڑیال نے کہا کہ ٹیمپر شدہ گاڑیوں کو نیلامی کی اجازت نہیں دی جا سکتی۔ حتیٰ کہ اگر ایسی گاڑیاں موٹر رجسٹریشن اتھارٹی کے پاس رجسٹرڈ ہوں، تب بھی وہ ضبطی کے قابل ہوں گی۔

کمیٹی کے چیئرمین نے ایف بی آر سے کہا کہ وہ ان ٹیمپر شدہ گاڑیوں کی تفصیلات فراہم کرے جو کسٹمز افسران استعمال کر رہے ہیں۔

کمیٹی کے ایک رکن نے سوال اٹھایا کہ جب پچھلی ایمنسٹی اسکیم کے تحت نان ڈیوٹی پیڈ گاڑیوں کی قانونی حیثیت دی جا رہی تھی تو اس وقت ٹیمپر شدہ گاڑیوں پر کسٹمز نے ڈیوٹی اور ٹیکس کیوں وصول کیے؟

اس پر ایف بی آر کے ممبر کسٹمز نے وضاحت کی کہ نئے سیکشن ”187اے۔ گاڑی کی قانونی حیثیت سے متعلق مفروضہ“ کے تحت، اگر کسی گاڑی کو اس ایکٹ یا اس کے تحت بنائے گئے قواعد کے تحت ضبط یا پکڑا جائے اور فرانزک معائنے کے دوران اس میں چیسس نمبر ٹیمپر شدہ، کٹ اینڈ ویلڈ، ویلڈنگ مٹیریل سے بھرا ہوا یا دوبارہ مہر شدہ یا باڈی تبدیل شدہ پایا جائے، تو ایسی گاڑی کو اسمگل شدہ تصور کیا جائے گا اور وہ ضبطی کے لیے قابل ہو گی، چاہے وہ کسی رجسٹریشن اتھارٹی کے پاس رجسٹرڈ کیوں نہ ہو۔

کاپی رائٹ بزنس ریکارڈر، 2025