پیٹرول کی قیمت میں اضافہ کردیا گیا

فنانس ڈویژن نے ہفتے کی شب اعلان کیا ہے کہ یکم جون 2025 سے پیٹرول کی قیمت میں فی لیٹر 1.00 روپے اضافہ کیا گیا ہے، جس کے بعد نئی قیمت 253.63 روپے فی لیٹر ہو گئی ہے۔ تاہم، ہائی اسپیڈ ڈیزل (ایچ ایس ڈی) کی قیمت آئندہ دو ہفتوں کے لیے 254.64 روپے فی لیٹر پر برقرار رہے گی۔

فنانس ڈویژن کی جانب سے جاری کردہ دیر رات اعلامیے کے مطابق یہ رد و بدل آئل اینڈ گیس ریگولیٹری اتھارٹی (اوگرا) اور دیگر متعلقہ حکومتی اداروں کی سفارشات کی روشنی میں کیا گیا ہے۔ پیٹرول کی ایکس ریفائنری قیمت 151.80 روپے سے بڑھا کر 154.55 روپے فی لیٹر کر دی گئی ہے، تاہم حکومت نے صارفین پر مکمل بوجھ منتقل کرنے سے گریز کرتے ہوئے ان لینڈ فریٹ ایکو لائزیشن مارجن (آئی ایف ای ایم) کو نمایاں طور پر کم کرتے ہوئے 6.30 روپے سے 4.55 روپے فی لیٹر کر دیا ہے۔

پیٹرول اور ہائی اسپیڈ ڈیزل دونوں پر پیٹرولیم لیوی (پی ایل) کی شرح برقرار رکھی گئی ہے، جو بالترتیب 78.02 روپے اور 77 روپے فی لیٹر ہے۔ اس کے علاوہ، مٹی کے تیل کی قیمت میں بھی معمولی اضافہ کیا گیا ہے اور یہ 250.14 روپے سے بڑھ کر 251.13 روپے فی لیٹر ہو گئی ہے۔