میٹکو فوڈز کا کارن اسٹارچ کاروبار علیحدہ کرکے ذیلی کمپنی میں ضم کرنے کا فیصلہ

پاکستان کے صفِ اوّل کے چاول برآمد کنندگان میں شمار ہونے والی کمپنی میٹکو فوڈز لمیٹڈ نے اپنے کارن اسٹارچ کے کاروبار کی تنظیمِ نو (کارپوریٹ ری اسٹرکچرنگ) کے اقدام کی منظوری دے دی ہے۔

اس فیصلے کے تحت کارن اسٹارچ کے کاروبار کو کمپنی سے علیحدہ کر کے میٹکو کارن پروڈکٹس (پرائیویٹ) لمیٹڈ میں ضم کیا جائے گا، جو کہ میٹکو کی مکمل ملکیتی ذیلی کمپنی ہے۔ کمپنی نے پیر کے روز پاکستان اسٹاک ایکسچینج (پی ایس ایکس) کو اس پیش رفت سے آگاہ کیا۔

نوٹس میں کہا گیا کہ یہ اعلامیہ میٹکو فوڈز لمیٹڈ کی 25 نومبر 2024، 28 فروری 2025، اور 9 مئی 2025 کو جاری کردہ اطلاعات/نوٹسز کا تسلسل ہے، جو کمپنی کی اسٹریٹجک حکمتِ عملی سے متعلق ہیں، جس کے تحت کارن اسٹارچ ڈویژن کو ایک مکمل ملکیتی ذیلی ادارے میں منتقل کر کے، اس کے لیے ترقیاتی سرمایہ حاصل کرنے کے امکانات کا جائزہ لیا جا رہا ہے۔

اسی تناظر میں، کمپنی کے بورڈ آف ڈائریکٹرز نے 23 مئی 2025 کو منظور کردہ سرکلر قراردادوں کے ذریعے، کمپنی کے کارن اسٹارچ ڈویژن سے متعلق مخصوص اثاثہ جات، واجبات، ذمہ داریوں اور امور کو علیحدہ کر کے، انہیں کمپنی کی ذیلی ادارہ میٹکو کارن پروڈکٹس (پرائیویٹ) لمیٹڈ (ایم سی پی پی ایل) میں ضم کرنے کی منظوری دی ہے۔

مجوزہ اسکیم کے تحت، میٹکو فوڈز اپنے کارن اسٹارچ کاروبار کو ایم سی پی پی ایل کو منتقل کرے گی، جس کے بدلے میں ایم سی پی پی ایل، میٹکو فوڈز کو شیئرز جاری کرے گا، یوں ایم سی پی پی ایل ایک مکمل ملکیتی ذیلی ادارے کے طور پر برقرار رہے گا۔

نوٹس میں مزید کہا گیا کہ اس اسکیم کا اطلاق تمام ضروری شیئر ہولڈرز، قرض دہندگان، اور ریگولیٹری اداروں کی منظوریوں کے بعد ہی ہوگا، ساتھ ہی سندھ ہائی کورٹ، کراچی کی جانب سے اسکیم کی توثیق، اور تمام قانونی تقاضوں کی تکمیل لازم ہوگی۔ مزید برآں، اگر کسی قسم کی تبدیلی یا ترمیم درکار ہوئی، تو وہ بھی شامل کی جا سکتی ہے۔

1964 میں میٹکو رائس پروسیسنگ پرائیویٹ لمیٹڈ کے طور پر قائم ہونے والی میٹکو فوڈز بنیادی طور پر چاول، چاول سے حاصل کردہ پروٹین، چاول گلوکوز، پنک سالٹ، مصالحہ جات، ڈیزرٹ مکسز وغیرہ کی پروسیسنگ اور برآمدات میں مصروف عمل ہے۔

یہ کمپنی ملک کے سب سے بڑے چاول برآمد کنندگان میں شمار ہوتی ہے اور اس کا فلیگ شپ برانڈ فالک دنیا کے 65 سے زائد ممالک میں برآمد کیا جاتا ہے۔