پاکستان اور چین کا جنگ بندی کے بعد خطے میں استحکام پر تبادلہ خیال

پاکستان اور چین نے منگل کے روز پاکستان اور بھارت کے درمیان جنگ بندی کے بعد خطے کی صورتحال پر تبادلہ خیال کیا اور علاقائی امن و استحکام کے قیام کے لیے اقوام متحدہ کے چارٹر اور بین الاقوامی قوانین کے اصولوں اور مقاصد کی پاسداری پر زور دیا۔

بیجنگ میں نائب وزیر اعظم و وزیر خارجہ اسحاق ڈار کی چین کی کمیونسٹ پارٹی کے بین الاقوامی امور کے وزیر لیو جیان چاؤ سے ملاقات ہوئی، جس کی تفصیلات وزارت خارجہ (ایف او) کی جانب سے جاری کردہ بیان میں بتائی گئیں۔

ملاقات کے دوران وزیر خارجہ اسحاق ڈار نے پاکستان کی خودمختاری اور علاقائی سالمیت کے لیے چین کی غیر متزلزل حمایت کو سراہا اور پرامن ہمسائیگی کے لیے پاکستان کے عزم کو دہراتے ہوئے اپنے ملک کے دفاع کی صلاحیت اور حق پر زور دیا۔

دفتر خارجہ کے بیان کے مطابق نائب وزیر اعظم/وزیر خارجہ نے بھارت کی جانب سے سندھ طاس معاہدے (آئی ڈبلیو ٹی) کو یکطرفہ اور غیر قانونی طور پر معطل کرنے کے فیصلے کا بین الاقوامی برادری کو نوٹس لینے کی ضرورت پر زور دیا۔

نائب وزیر اعظم نے اس بات پر بھی زور دیا کہ اقوام متحدہ کی سلامتی کونسل کی قراردادوں کے مطابق جموں و کشمیر کے تنازع کا حل جنوبی ایشیا میں پائیدار امن کے لیے ناگزیر ہے۔

اپنے دورے کے دوران، وزیر خارجہ اسحاق ڈار چینی وزیر خارجہ وانگ ژی کے ساتھ جنوبی ایشیا میں بدلتی ہوئی علاقائی صورتحال اور اس کے امن و استحکام پر اثرات پر تفصیلی بات چیت کریں گے۔

دونوں ممالک پاکستان اور چین کے درمیان دوطرفہ تعلقات کے تمام پہلوؤں کا جائزہ لیں گے اور باہمی دلچسپی کے علاقائی و عالمی امور پر تبادلہ خیال کریں گے۔