شِفا انٹرنیشنل ہاسپٹلز لمیٹڈ ذیلی ادارے ایس ایم سی آئی میں اقلیتی شیئرز خریدے گا

شِفا انٹرنیشنل ہاسپٹلز لمیٹڈ (ایس آئی ایچ ایل) نے اپنی ذیلی کمپنی شِفا میڈیکل سینٹر اسلام آباد (پرائیویٹ) لمیٹڈ (ایس ایم سی آئی) میں موجود اقلیتی حصص داروں کے تمام حصص خریدنے کا منصوبہ بنایا ہے۔ یہ اقدام آپریشنز کو منظم کرنے اور مستقبل کی ترقی کی راہ ہموار کرنے کی وسیع تر حکمت عملی کا حصہ ہے۔

ایس آئی ایچ ایل نے پیر کے روز پاکستان اسٹاک ایکسچینج (پی ایس ایکس) کو جاری کردہ ایک اطلاع میں اس پیش رفت سے آگاہ کیا۔

اعلامیے میں کہا گیا کہ ایس آئی ایچ ایل کے بورڈ آف ڈائریکٹرز نے اپنے اجلاس مورخہ 10 مئی 2025 کو ایس ایم سی آئی میں اقلیتی حصص داروں کی جانب سے رکھے گئے تمام حصص خریدنے کی تجویز پر غور کیا اور اس کی منظوری دی۔ اس مقصد کے لیے متعلقہ فریقین سے مذاکرات کر کے شیئر پرچیز ایگریمنٹس طے کیے جائیں گے اور شیئر ٹرانسفر ڈیڈز پر دستخط کیے جائیں گے۔

یہ لین دین ایس ایم سی آئی کو مکمل طور پر ایس آئی ایچ ایل کی ملکیت میں لے آئے گا، جس کے نتیجے میں اسے مکمل طور پر ضم کرنا ممکن ہو جائے گا۔

اعلامیے میں مزید کہا گیا کہ یہ تجویز، نہ صرف کارپوریٹ ڈھانچے کو سادہ بنانے اور غیر ضروری انتظامی پرتوں و باہمی کمپنی تعلقات کو ختم کرنے میں مدد دے گی، بلکہ اس کے نتیجے میں ایس آئی ایچ ایل کے اثاثہ جات اور مجموعی حجم میں اضافہ ہو گا، جس سے ادارہ مشترکہ کاروبار کے لیے معاشی پیمانے کے فوائد زیادہ مؤثر طریقے سے حاصل کر سکے گا۔

کمپنی کو توقع ہے کہ اس تجویز کردہ لین دین کے نتیجے میں ایس آئی ایچ ایل کے لیے کاروبار کو وسعت دینے کے مزید مواقع بھی پیدا ہوں گے۔ تاہم، اس لین دین کی تکمیل تمام ضروری کارپوریٹ و ریگولیٹری منظوریوں اور اجازتوں سے مشروط ہو گی۔

شِفا انٹرنیشنل ہاسپٹلز لمیٹڈ کو پاکستان میں 1987 میں ایک پرائیویٹ لمیٹڈ کمپنی کے طور پر قائم کیا گیا تھا، اور 1989 میں اسے پبلک لمیٹڈ کمپنی میں تبدیل کر دیا گیا تھا۔

یہ کمپنی پاکستان بھر میں میڈیکل سینٹرز، اسپتالوں، فارمیسیز اور لیب کلیکشن پوائنٹس قائم کرنے اور چلانے میں مصروف عمل ہے۔