پیٹرولیم ڈویژن نے سی پی پیز لیوی ایڈجسٹمنٹ کو مستقبل کے بلوں میں ظاہر کرنے کی وضاحت کردی

پیٹرولیم ڈویژن نے واضح کیا ہے کہ کیپٹیو پاور پلانٹس (سی پی پیز) پر عائد لیوی میں کسی بھی قسم کی چھوٹ یا ایڈجسٹمنٹ صرف اسی ماہ کے فیول چارج ایڈجسٹمنٹ (ایف سی اے) کی نیپرا کی جانب سے کی گئی منظوری کی بنیاد پر آئندہ بلنگ مہینوں میں کی جائے گی، جس ماہ کے بجلی کے ٹیرف پر یہ اطلاق ہوگا۔

پیٹرولیم ڈویژن نے سوئی ناردرن گیس پائپ لائن لمیٹڈ (ایس این جی پی ایل) اور سوئی سدرن گیس کمپنی لمیٹڈ (ایس ایس جی سی) کو ارسال کردہ ایک خط میں ”گرڈ (کیپٹیو پاور پلانٹس) لیوی آرڈیننس 2025“ کے تحت لیوی کے نفاذ اور وصولی کی وضاحت کی۔

اس سے قبل، پیٹرولیم ڈویژن نے گیس یوٹیلٹیز کو ہدایت کی تھی کہ وہ کیپٹیو پاور پلانٹس کے صارفین سے فروری 2025 کے مہینے سے نئی نافذ شدہ لیوی آرڈیننس کے تحت بلنگ کا آغاز کریں۔

مزید ہدایت دی گئی کہ بلنگ آرڈیننس کے سیکشن 3 کے مطابق کی جائے، جس کے تحت اُن کیپٹیو پاور پلانٹس پر جو نیشنل گرڈ سے منسلک نہیں ہیں، گیس کے استعمال پر لیوی لاگو کی گئی ہے۔

ایک سابقہ مراسلے میں متعلقہ گیس تقسیم کار کمپنیوں کو فوری عملدرآمد یقینی بنانے اور اب تک جاری کردہ یا جاری کیے جانے والے بلوں کی مجموعی رقم متعلقہ حکام کو فوری طور پر رپورٹ کرنے کی ہدایت کی گئی تھی۔

یہ آرڈیننس، جو رواں سال کے اوائل میں نافذ کیا گیا، بین الاقوامی مالیاتی فنڈ (آئی ایم ایف) کے ساتھ طے شدہ وعدوں کا حصہ ہے، جس کا مقصد غیر موثر کیپٹیو پاور جنریشن کی حوصلہ شکنی اور صنعتی صارفین کو نیشنل الیکٹریسٹی گرڈ کی جانب منتقل کرنا ہے۔

کاپی رائٹ بزنس ریکارڈر، 2025