پاکستانیوں شہریوں کے لیے واہگہ بارڈر بند نہیں، دفتر خارجہ

دفتر خارجہ نے بھارتی میڈیا کے جھوٹے پروپیگنڈے کو مسترد کرتے ہوئے اس دعوے کی تردید کی کہ پاکستان نے واہگہ بارڈر اپنے شہریوں کے لیے بند کردیا ہے جو بھارت سے واپس آنا چاہتے ہیں۔

بھارتی میڈیا میں آنے والی خبروں سے متعلق سوالات کا جواب دیتے ہوئے وزارت خارجہ کے ترجمان شفقت علی خان نے وضاحت کی کہ واہگہ بارڈر پاکستانی شہریوں کے لیے جو بھارت سے واپس آنا چاہتے ہیں آئندہ بھی کھلا رہے گا۔

ترجمان دفتر خارجہ نے مزید کہا کہ واہگہ-اٹاری بارڈر کے ذریعے سرحد پار کرنے کی آخری تاریخ 30 اپریل 2025 تھی۔

دفتر خارجہ کے بیان کے مطابق بھارت کی جانب سے پاکستانی شہریوں کے ویزے منسوخ کرنے کے فیصلے سے سنگین انسانی مسائل جنم لے رہے ہیں۔ کئی مریض جن کی صحت نازک تھی، علاج مکمل کیے بغیر پاکستان واپس جانے پر مجبور ہو گئے۔ مزید برآں، ایسے واقعات بھی رپورٹ ہوئے ہیں جن میں خاندان بکھر گئے اور بچے اپنے والدین میں سے کسی ایک سے جدا ہوگئے۔

بیان میں کہا گیا کہ ’اس تناظر میں، ہم میڈیا کی ان رپورٹس سے آگاہ ہیں جن میں بتایا گیا ہے کہ کچھ پاکستانی شہری اٹاری میں پھنسے ہوئے ہیں۔ شفقت علی خان نے مزید کہا کہ اگر بھارتی حکام انہیں اپنی طرف سے سرحد پار کرنے کی اجازت دیتے ہیں تو ہم اپنے شہریوں کا استقبال کرنے کے لئے تیار ہیں۔

قومی سلامتی کمیٹی (این ایس سی) نے 24 اپریل کو وزیرِ اعظم کی زیرِ صدارت فیصلہ کیا کہ بھارت کی یکطرفہ طور پر سندھ طاس معاہدہ معطل کرنے کے بعد، پہلگام واقعہ کے پس منظر میں واگہ بارڈر پوسٹ کو فوراً بند کر دیا جائے گا۔

اس فیصلے کے مطابق بھارت سے اس راستے کے ذریعے کسی بھی قسم کی سرحدی آمدورفت معطل کر دی جائے گی، بغیر کسی استثنا کے۔ جو افراد درست اجازت نامے کے ساتھ عبور کر چکے ہیں، وہ اس راستے سے فوراً واپس آ سکتے ہیں لیکن آخری تاریخ 30 اپریل 2025 تک۔

پاکستان نے سارک ویزا استثنیٰ اسکیم (ایس وی ای ایس) کے تحت بھارتی شہریوں کو جاری کیے گئے تمام ویزے بھی معطل کردیے ہیں اور سکھ مذہبی یاتریوں کو چھوڑ کر انہیں فوری طور پر منسوخ کردیا ہے۔

کاپی رائٹ بزنس ریکارڈر، 2025