پاکستان ڈیجیٹل اکانومی کے عروج کے دہانے پر ہے، وزیراعظم

وزیراعظم شہباز شریف نے بدھ کے روز کہا کہ پاکستان اپنی ڈیجیٹل معیشت میں نمایاں ترقی کے دہانے پر ہے، کیونکہ ملک نے پہلے ڈیجیٹل فارن ڈائریکٹ انویسٹمنٹ فورم میں 70 کروڑ ڈالر سے زائد کی سرمایہ کاری کے وعدے حاصل کیے ہیں۔

وفاقی دارالحکومت میں منعقدہ فورم میں شریک معروف آئی ٹی کمپنیوں کے نمائندوں سے خطاب کرتے ہوئے وزیراعظم نے سرمایہ کاری کے اعلانات کا خیر مقدم کیا اور پاکستان کے ٹیکنالوجی سیکٹر پر اعتماد ظاہر کرنے پر کمپنیوں کو سراہا۔

انہوں نے کہا کہ حکومت پاکستان کو ٹیکنالوجی، فنانس اور جدت کا علاقائی مرکز بنانے کا عزم رکھتی ہے، اور اس سلسلے میں جاری ریگولیٹری اصلاحات، مالی مراعات اور ڈیجیٹل انفراسٹرکچر میں سرمایہ کاری کو اجاگر کیا۔

وزیراعظم نے نوجوانوں کی تربیت اور معیشت کو ڈیجیٹل بنانے کی حکومتی کوششوں کا بھی ذکر کیا، اور سرمایہ کاروں کو مکمل تعاون کی یقین دہانی کراتے ہوئے طویل المدتی شراکت داری کے عزم کا اظہار کیا۔

انہوں نے مصنوعی ذہانت اور ڈیٹا سائنس کی تعلیم کے حوالے سے غیر ملکی شراکت داروں کے ساتھ تعاون میں دلچسپی ظاہر کی تاکہ پاکستان کی افرادی قوت کو مستقبل کے لیے بہتر تیار کیا جا سکے۔

سرمایہ کاری کرنے والوں میں روس سوفٹ کے جبار رحیم خان شامل تھے جنہوں نے 500 ملین ڈالر کی سرمایہ کاری کا اعلان کیا۔ سائی وینچر کیپیٹل کے طحہ نسیم اور احسن جمیل نے 100 ملین ڈالر، مشرق بینک کے فرنینڈو موریلو اور محمد ہمایوں سجاد نے 30 ملین ڈالر جبکہ مائنڈ ہائیو ڈاٹ اے آئی کے بلال کمال فاروقی نے 22 ملین ڈالر کی سرمایہ کاری کا اعلان کیا۔

کاپی رائٹ بزنس ریکارڈر، 2025