پاکستانی خواتین کرکٹ ٹیم ورلڈ کپ کیلئے بھارت نہیں جائیگی، محسن نقوی

پاکستان کرکٹ بورڈ (پی سی بی) کے چیئرمین محسن نقوی نے ایک بار پھر اس بات کا اعادہ کیا ہے کہ قومی ویمنز کرکٹ ٹیم آئی سی سی ویمنز کرکٹ ورلڈ کپ کے لیے بھارت کا سفر نہیں کرے گی، اور اس فیصلے کو اُس ”ہائبرڈ ماڈل“ کے تحت برقرار رکھا گیا ہے جس پر پہلے ہی اتفاق ہو چکا ہے۔

محسن نقوی نے یہ بات ہفتے کے روز لاہور سٹی کرکٹ ایسوسی ایشن (ایل سی سی اے) گراؤنڈ کے دورے کے دوران کہی، جہاں انہوں نے آئی سی سی ویمنز ورلڈ کپ کوالیفائر میں شاندار کارکردگی پر پاکستان ویمنز ٹیم کو مبارکباد دی۔

قومی ٹیم نے مسلسل پانچ فتوحات حاصل کرتے ہوئے ورلڈ کپ کے لیے کوالیفائی کیا، جن میں آخری میچ میں بنگلہ دیش کے خلاف فیصلہ کن فتح بھی شامل ہے۔

جب ان سے پاکستان کی ٹورنامنٹ میں شرکت کے بارے میں پوچھا گیا تو محسن نقوی نے کہا کہ پاکستان بھارت نہیں جائے گا، کیونکہ اس فارمولا پر پہلے ہی اتفاق ہو چکا ہے۔

انہوں نے مزید کہا کہ پاکستان کے میچز کے لیے غیر جانبدار مقام کا فیصلہ میزبان ملک کرے گا، تاہم ٹیم بھارت میں کھیلنے نہیں جائے گی۔

ہائبرڈ ماڈل کا پہلا اطلاق رواں سال کے آغاز میں آئی سی سی مینز چیمپئنز ٹرافی کے دوران ہوا تھا، جہاں بھارت نے سیاسی کشیدگی کے باعث غیر جانبدار مقامات پر اپنے میچز کھیلے تھے۔

محسن نقوی نے خواتین ٹیم کی شاندار کوالیفائنگ مہم کو سراہتے ہوئے کہا کہ جب کوئی ٹیم اتحاد اور یکجہتی کے ساتھ کھیلتی ہے تو نتائج ایسے ہی ہوتے ہیں۔ یہ ٹیم قابلِ ستائش ہے اور ان کی کارکردگی کا انعام دیا جائے گا۔

پاکستان نے تھائی لینڈ کے خلاف 87 رنز سے جیت کے بعد بنگلہ دیش کو سات وکٹوں سے شکست دے کر کوالیفائر مرحلہ کامیابی سے مکمل کیا ہے۔

آئی سی سی ویمنز کرکٹ ورلڈ کپ رواں سال کے آخر میں بھارت میں شیڈول ہے۔