ایس ای سی پی کا کارپوریٹس کیلئے ایک ہی دن اکاؤنٹ کھولنے کا اقدام

سیکیورٹیز اینڈ ایکسچینج کمیشن آف پاکستان (ایس ای سی پی ) پاکستان کے مرکزی بینک اسٹیٹ بینک آف پاکستان (ایس بی پی )، پاکستان بینکنگ ایسوسی ایشن (پی بی اے) اور بینکوں کے ساتھ مل کر کارپوریٹ اداروں کیلئے اسی دن اکاؤنٹ کھولنے کی سہولت کے لیے ایک معیاری ایپلیکیشن انٹرفیس تیار کررہا ہے۔

اس حوالے سے ایس ای سی پی نے سینٹرل ڈپازٹری کمپنی (سی ڈی سی) کے ساتھ مشاورت سے ایک کانسپٹ پیپر تیار کیا ہے تاکہ ایزی فائل پورٹل کو اسی دن کارپوریٹ بینک اکاؤنٹ کھولنے کیلئے مزید بہتر بنایا جاسکے ۔ اس کانسپٹ پیپر کی نمایاں خصوصیات میں ضوابطی، تکنیکی اور ڈیجیٹل طریقہ کار کو بینکنگ نظام کے ساتھ ہم آہنگ کرنا شامل ہے تاکہ عمل کو مؤثر بنایا جا سکےغیر ضروری رکاوٹیں ختم کی جا سکیں اور کارکردگی کو بہتر کیا جا سکے۔ اس کا مقصد کاروبار میں آسانی کو فروغ دینا، مالی شمولیت کو فروغ دینے اور معاشی ترقی کی حمایت کرنا ہے، تاکہ نئی قائم ہونے والی کمپنیوں کو فوری طور پر بینکاری خدمات تک رسائی حاصل ہو۔

پورٹل میں کارپوریٹ اکاؤنٹ کھولنے کا نیا سیکشن متعارف کرایا جائے گاجو کمپنیوں کو رجسٹریشن کے دوران اضافی دستاویزات جمع کروا کر بینک اکاؤنٹ کھولنے کی سہولت فراہم کرے گا۔ تصدیق شدہ ڈیٹا منتخب بینکوں کے ساتھ شیئر کیا جائے گا تاکہ بغیر کسی رکاوٹ کے، معیاری اورایک ہی دن اکاؤنٹ کھولنےکےعمل کوممکن بنایا جا سکے۔ایک پُش بیسڈ میکانزم ریئل ٹائم ڈیٹا ایکسچینج کو یقینی بنائے گا جب کہ بینکوں کے ساتھ اے پی آئی انضمام، مرکزی اکاؤنٹ ایکٹیویشن کے لیے ای-الرٹس اور عارضی اکاؤنٹس کی سہولت سے کارکردگی اور ضابطے کی مطابقت کومزید بہتر بنایا جائے گا ۔ ٹرانزیکشن پروسیسنگ کو مزید ہموار کرنے کیلئے راست پلیٹ فارم سے بھی استفادہ کیا جا سکتا ہے۔

کمیشن کے مطابق کانسپٹ پیپر میں یہ خصوصیت کمپنی کی رجسٹریشن اور کارپوریٹ بینکنگ کیلئے ایک زیادہ مؤثر اور جامع حل فراہم کرنے کیلئے متعارف کرائی جارہی ہے۔