گل احمد ٹیکسٹائل ملز لمیٹڈ (جی اے ٹی ایم) جو ملک کی سب سے بڑی ٹیکسٹائل ملز میں شامل ہے نے پائیدار اصولوں کے تحت خصوصی ٹیکسٹائل آپریشنز کے لیے چار مکمل ملکیتی ذیلی کمپنیاں قائم کرنے کے منصوبے کا اعلان کیا ہے۔
لسٹڈ کمپنی نے جمعہ کو پاکستان اسٹاک ایکسچینج (پی ایس ایکس) کو ایک نوٹس کے ذریعے اس پیش رفت سے آگاہ کیا۔
کمپنی کے اسٹاک ایکسچینج کو جاری کردہ سرکلر میں کہا گیا ہے کہ کمپنی کی انتظامیہ بدلتے ہوئے کاروباری ماحول میں اپنے کاروبار اور آپریشنز کو وسعت دینے اور بہتر بنانے کے مواقع تلاش کرنے کی خواہشمند ہے، جس میں صارفین کی ضروریات کے مطابق پائیدار اصولوں کے تحت ٹیکسٹائل آپریشنز کرنا اور توانائی کے متبادل ذرائع کی طرف منتقلی شامل ہے تاکہ ممکنہ طور پر فوسل فیول پر انحصار کم کیا جا سکے۔
جی اے ٹی ایم کے مطابق انتظامیہ کا مؤقف ہے کہ ایسے کاروبار اور اقدامات کمپنی کی چار مکمل ملکیتی ذیلی کمپنیوں کے تحت شروع کیے جائیں۔
نوٹس میں کہا گیا ہے کہ ہر ذیلی کمپنی کمپنیز ایکٹ 2017 کے تحت ایک پرائیویٹ لمیٹڈ کمپنی کے طور پر کام کرے گی، جس میں گل احمد ٹیکسٹائل ملز لمیٹڈ کے پاس 100 فیصد شیئرز ہوں گے ۔
جی اے ٹی ایم تمام ضروری قانونی کارروائیاں مکمل کرنے کا ارادہ رکھتا ہے، جبکہ ایس ای سی پی کے ضوابط اور کمپنیز ایکٹ 2017 کے تحت تمام قانونی تقاضوں پر عمل درآمد بھی یقینی بنایا جائے گا۔
گل احمد گروپ 1900 کی دہائی سے ٹیکسٹائل کے شعبے میں سرگرم ہے، تاہم اس نے 1953 میں گل احمد ٹیکسٹائل ملز کے نام سے اپنی پیداواری سرگرمیاں شروع کیں اور 1955 میں پبلک لمیٹڈ کمپنی کا درجہ حاصل کر لیا۔
جی اے ٹی ایم ایک مکمل ٹیکسٹائل مل ہے جو ٹیکسٹائل مصنوعات کی تیاری اور فروخت میں مصروف ہے۔ مینوفیکچرنگ سیکٹر میں مضبوط موجودگی کے ساتھ ساتھ، کمپنی کا ریٹیل کاروبار میں بھی نمایاں مقام ہے۔
کمپنی نے اپنا ریٹیل بزنس کراچی سے شروع کیا، جو ملک بھر میں 40 سے زائد اسٹورز تک پھیل چکا ہے، جہاں فیشن اور ملبوسات سے لے کر ہوم ایکسیسریز تک متنوع مصنوعات دستیاب ہیں۔
Comments
Comments are closed.