معیشت، تجارت اور ماحولیات، ایس سی او کے درمیان تعلقات کو فروغ دینے کیلئے اہم فیصلے کیے جائیں گے

پاکستان شنگھائی تعاون تنظیم (ایس سی او) کے سربراہان حکومت کی کونسل کے دو روزہ اجلاس کی میزبانی کرے گا۔

اجلاس کی صدارت وزیراعظم محمد شہباز شریف کریں گے۔

شنگھائی تعاون تنظیم کے رکن ممالک کی نمائندگی چین کے وزیر اعظم لی چیانگ، روس، بیلاروس، قازقستان، کرغزستان، تاجکستان اور ازبکستان کے وزرائے اعظم کے علاوہ ایران کے پہلے نائب صدر اور ہندوستان کے وزیر خارجہ کریں گے۔

منگولیا کے وزیر اعظم بطور مبصر ریاست، کابینہ کے نائب چیئرمین اور ترکمانستان کے وزیر خارجہ بھی بطور مہمان خصوصی اجلاس میں شرکت کریں گے۔

شنگھائی تعاون تنظیم کے سربراہان حکومت کی کونسل کے اجلاس میں معیشت، تجارت، ماحولیات اور سماجی و ثقافتی روابط کے شعبوں میں جاری تعاون پر تبادلہ خیال کیا جائے گا اور تنظیم کی کارکردگی کا جائزہ لیا جائے گا۔

اجلاس کے موقع پر وزیر اعظم شہباز شریف وفود کے سربراہان سے اہم دوطرفہ ملاقاتیں بھی کریں گے۔

میگا انٹرنیشنل ایونٹ میں شرکت کے لیے غیر ملکی وفود پاکستان پہنچنا شروع ہو گئے

سربراہان حکومت شنگھائی تعاون تنظیم کے رکن ممالک کے درمیان تعاون کو مزید بڑھانے کے لئے اہم تنظیمی فیصلے کریں گے اور تنظیم کے بجٹ کی منظوری دیں گے۔

ترجمان دفتر خارجہ کے مطابق روس کا 76 رکنی وفد، چین کا 15 رکنی وفد، بھارت کا 4 رکنی سرکاری وفد، کرغزستان کا 4 رکنی وفد اور ایران کا 2 رکنی وفد پہلے ہی اسلام آباد پہنچ چکا ہے۔ شنگھائی تعاون تنظیم کے سات نمائندے بھی پاکستان پہنچ چکے ہیں۔

کاپی رائٹ بزنس ریکارڈر، 2024