امریکی وزیر دفاع کی اسرائیل میں نیتن یاہو سے غیر اعلانیہ ملاقات

امریکی وزیر دفاع پیٹ ہیگسیتھ نے پیر کو اسرائیل کے غیر اعلانیہ دورے کے دوران وزیراعظم بینجمن نیتن یاہو سے ملاقات کی۔ ویب سائٹ ایکسیوس نے معاملے سے آگاہ دو ذرائع کے حوالے سے یہ خبر دی۔ تاہم، رائٹرز فوری طور پر اس ملاقات کی تصدیق نہیں کرسکا۔

ہیگسیتھ نے سوشل میڈیا پر بتایا کہ انہوں نے امریکی سینٹرل کمانڈ کے دائرہ کار میں تعینات امریکی فوجیوں سے ملاقات کی، جس میں مشرق وسطیٰ، شمال مشرقی افریقا اور ایشیا کے بعض حصے شامل ہیں۔ پینٹاگون نے تبصرے سے گریز کیا، جبکہ واشنگٹن میں اسرائیلی سفارت خانے نے بھی فوری جواب نہیں دیا۔

یہ دورہ امریکی صدر ڈونلڈ ٹرمپ کی جانب سے آئندہ ہفتے ہونے والے اسرائیلی پارلیمانی انتخابات میں نیتن یاہو کی حمایت کے ایک روز بعد سامنے آیا ہے۔ یہ انتخابات 7 اکتوبر 2023 کو حماس کے حملے کے بعد پہلے عام انتخابات ہوں گے، جس کے بعد اسرائیل نے غزہ، لبنان اور ایران میں جنگ کی۔

رائے عامہ کے جائزوں کے مطابق نیتن یاہو کے مذہبی قوم پرست اتحاد کی حکومتی اکثریت کھونے کا امکان ہے، تاہم اپوزیشن کے لیے بھی حکومت تشکیل دینا مشکل ہوسکتا ہے۔

دوسری جانب امریکی نائب صدر جے ڈی وینس نے پیر کو ایک انٹرویو میں نیتن یاہو کی حمایت سے گریز کرتے ہوئے کہا کہ وہ اسرائیلی انتخابات میں مداخلت نہیں کریں گے۔ انہوں نے کہا کہ ان کی توجہ امریکی امیدواروں اور وسط مدتی انتخابات پر مرکوز ہے۔