وزیراعظم شہباز شریف کل سے ایران اور ترکیہ کے دورے پر روانہ ہوں گے، ترجمان دفتر خارجہ

دفترِ خارجہ نے اعلان کیا ہے کہ وزیراعظم شہباز شریف 3 سے 5 جولائی تک ایران اور ترکیہ کے سرکاری دورے پر روانہ ہوں گے، جہاں وہ ایران کے رہبرِ اعلیٰ کے انتقال پر تعزیت کا اظہار اور دوطرفہ تعاون کو مضبوط بنانے کے لیے اعلیٰ سطح کے مذاکرات کریں گے۔

ہفتہ وار میڈیا بریفنگ کے دوران ترجمان دفترِ خارجہ طاہر اندرابی نے بتایا کہ وزیراعظم کے ہمراہ نائب وزیراعظم اور وزیرِ خارجہ اسحاق ڈار، کابینہ کے ارکان اور اعلیٰ سرکاری حکام بھی ہوں گے۔

وزیراعظم اپنے دورے کے پہلے مرحلے میں ایران جائیں گے جہاں وہ مرحوم ایرانی رہبرِ اعلیٰ آیت اللہ علی خامنہ ای کی آخری رسومات میں شرکت کریں گے۔ دورے کے دوران وہ ایرانی قیادت اور سوگوار خاندانوں سے پاکستان کے عوام اور حکومت کی جانب سے تعزیت کا اظہار کریں گے اور دکھ کی اس گھڑی میں برادر ملک کے ساتھ پاکستان کی یکجہتی کا اعادہ کریں گے۔

اس کے بعد وزیراعظم شہباز شریف ترکیہ کے صدر رجب طیب اردوان کی دعوت پر استنبول روانہ ہوں گے۔ دونوں رہنماؤں کے مابین دوطرفہ تعلقات کے تمام پہلوؤں کا جائزہ لیے جانے کا امکان ہے، جس میں خاص طور پر تجارت اور سرمایہ کاری کے شعبوں میں تعاون کو وسعت دینے کے ساتھ ساتھ علاقائی امن و سلامتی پر بھی تبادلہ خیال کیا جائے گا۔

استنبول میں قیام کے دوران وزیراعظم پاکستان کی جانب سے منعقدہ ایک بزنس کانفرنس سے بھی خطاب کریں گے، جس کا مقصد ترجیحی شعبوں بشمول اسپیشل اکنامک زونز (ایس ای زیڈز)، توانائی، تجارت، انفارمیشن ٹیکنالوجی اور نجکاری میں پاکستان کے اندر سرمایہ کاری کے مواقع کو اجاگر کرنا ہے۔ اس تقریب میں ترکیہ کے ممتاز کاروباری رہنما، سرمایہ کار اور اعلیٰ حکام شرکت کریں گے۔

ترجمان دفترِ خارجہ نے مزید کہا کہ یہ دورے ایران اور ترکیہ کے ساتھ پاکستان کے دیرینہ برادرانہ، تاریخی اور ثقافتی تعلقات کی عکاسی کرتے ہیں۔