امریکی نائب صدر وینس کا ایران مذاکرات کے لیے آئندہ دنوں سوئٹزرلینڈ جانے کا عندیہ

امریکی نائب صدر جے ڈی وینس نے ہفتے کے روز کہا ہے کہ انہیں توقع ہے کہ وہ آئندہ چند روز میں ایران کے ساتھ مذاکرات کے لیے سوئٹزرلینڈ روانہ ہوں گے۔ انہوں نے یہ بھی بتایا کہ امریکی مذاکرات کاروں نے اطلاع دی ہے کہ ”معاملات خوش اسلوبی سے آگے بڑھ رہے ہیں“۔ ان کا یہ بیان ایران کی جانب سے آبنائے ہرمز کو ایک بار پھر بند کرنے کے اعلان سے چند منٹ قبل سامنے آیا ہے۔

وینس نے فوکس نیوز سے گفتگو کرتے ہوئے کہا کہ ”مجھے توقع ہے کہ میں اگلے ایک دو روز میں روانہ ہو جاؤں گا، تاہم آپ جانتے ہیں کہ ایسے معاملات میں رابطہ کاری کا عمل ہمیشہ نہایت حساس اور پیچیدہ ہوتا ہے۔“ یہ بیان انہوں نے ایران کے ساتھ جنگ کے خاتمے کے لیے طے پانے والے امریکہ ایران معاہدے کے اگلے مراحل پر بات چیت کے لیے اپنا مجوزہ دورہ غیر متوقع طور پر ملتوی کرنے کے دو روز بعد دیا۔

نائب صدر نے بتایا کہ امریکی مذاکرات کار جیرڈ کشنر اور اسٹیو وِٹکوف پہلے ہی سوئٹزرلینڈ میں موجود ہیں اور مذاکرات کے ”بعض تکنیکی پہلوؤں“ پر کام کر رہے ہیں۔ ان کے بقول، دونوں نے انہیں آگاہ کیا ہے کہ ”امور خوش اسلوبی سے آگے بڑھ رہے ہیں“۔