سفارتی تعلقات کی 75 ویں سالگرہ : پاک چین دوستی کی تاریخ میں کوئی مثال نہیں ملتی، وزیر اعظم

وزیرِ اعظم شہباز شریف نے چین کے ساتھ پاکستان کے تعلقات کو ثابت قدم اور تاریخ کے اوراق میں بے مثال قرار دیتے ہوئے خراجِ تحسین پیش کیا ہے۔ انہوں نے کہا کہ بیجنگ نے گزشتہ 75 برسوں کے دوران ہر چیلنج میں تسلسل کے ساتھ اسلام آباد کا ساتھ دیا ہے۔

پاک-چین سفارتی تعلقات کی 75 ویں سالگرہ کے موقع پر اسلام آباد میں منعقدہ ایک تقریب سے خطاب کرتے ہوئے وزیرِ اعظم نے کہا کہ دونوں ممالک کے مابین تعلقات اب ایک ایسی منفرد شراکت داری میں بدل چکے ہیں جس کی بنیاد بھروسے، خلوص اور باہمی تعاون پر ہے۔

شہباز شریف کا کہنا تھا کہ پاکستان چین کو تسلیم کرنے والا پہلا مسلم ملک اور دنیا کے اولین ممالک میں سے ایک تھا۔ انہوں نے مزید کہا کہ دونوں ممالک کے بانی رہنماؤں نے جس دوستی کی بنیاد رکھی تھی وہ اب ایک لازوال دوستی میں تبدیل ہو چکی ہے۔ ان کا کہنا تھا کہ قدرتی آفات، معاشی چیلنجز اور مشکل ادوار میں چین پاکستان کے ساتھ ”ایک چٹان کی طرح مضبوط“ کھڑا رہا۔

وزیرِ اعظم نے کہا کہ زلزلے ہوں، سیلاب ہو، امن کا وقت ہو یا مشکل حالات چین نے ہمیشہ غیر متزلزل انداز میں پاکستان کا ساتھ دیا ہے۔

اہم اور بنیادی عالمی امور پر بیجنگ کے لیے اسلام آباد کی حمایت کا اعادہ کرتے ہوئے شہباز شریف نے کہا کہ پاکستان ”ون چائنہ“ (ایک چین) کی پالیسی پر ”بغیر کسی خوف یا مصلحت کے“ کاربند رہے گا۔

وزیرِ اعظم نے چین پاکستان اقتصادی راہداری (سی پیک) کو صدر شی جن پنگ کے ’بیلٹ اینڈ روڈ انیشیٹو‘ کے تحت پاکستان کی معاشی ترقی کے لیے چین کے عزم کی ایک بڑی علامت قرار دیا۔ انہوں نے کہا کہ اس راہداری نے پاکستان میں انفرااسٹرکچر کی ترقی، روزگار کے مواقع پیدا کرنے اور معاشی ترقی میں اہم کردار ادا کیا ہے۔

ایران اور امریکہ کے درمیان جاری حالیہ سفارتی کوششوں کا حوالہ دیتے ہوئے شہباز شریف نے کہا کہ چین نے امن و استحکام کے فروغ کے لیے پاکستان کے اقدامات کی بھرپور حمایت کی ہے۔ انہوں نے کہا ہمارے ہاں کسی بھی سیاسی تبدیلی یا شرط کے بغیر ایک دوسرے کا ساتھ دینے کی تاریخ موجود ہے۔ چین ہمیشہ پاکستان کا ایک ثابت قدم اور قابلِ اعتماد دوست رہا ہے۔

وزیرِ اعظم نے اس بات پر بھی زور دیا کہ پاکستان میں کام کرنے والے چینی شہریوں کی حفاظت کو یقینی بنانا حکومت کی اولین ترجیح ہے۔ انہوں نے مزید کہا کہ ہم چینی شہریوں کو اعلیٰ ترین سطح کی سیکیورٹی فراہم کرنے کے لیے کوئی کسر اٹھا نہیں رکھیں گے۔

اس پروقار تقریب میں صدرِ مملکت آصف علی زرداری، چیئرمین سینیٹ یوسف رضا گیلانی، اسپیکر قومی اسمبلی ایاز صادق اور نائب وزیرِ اعظم و وزیرِ خارجہ اسحاق ڈار سمیت دیگر اعلیٰ حکام نے بھی شرکت کی۔