امریکی سینیٹ میں ٹرمپ کے جنگی اختیارات محدود کرنے کی قرارداد لانے کا اعلان

امریکہ میں قانون سازوں نے ایران کے ساتھ جاری جنگ کو روکنے کے لیے ایک بار پھر کوششیں تیز کر دی ہیں۔ سینیٹ میں ڈیموکریٹک رہنما چک شومر نے بدھ کے روز اعلان کیا کہ وہ آئندہ ہفتے ایک قرارداد پیش کریں گے جس کا مقصد جنگ کو روکنا اور صدر ڈونلڈ ٹرمپ کو کسی بھی مزید فوجی کارروائی سے قبل کانگریس کی منظوری لینے کا پابند بنانا ہے۔

نیویارک میں پریس کانفرنس سے خطاب کرتے ہوئے چک شومر نے کہا کہ اس خطرناک وقت میں کانگریس کو اپنے اختیارات دوبارہ منوانا ہوں گے۔ ان کا یہ بیان صدر ٹرمپ کی جانب سے ایران کے ساتھ دو ہفتوں کی جنگ بندی کے اعلان کے چند گھنٹوں بعد سامنے آیا۔ ٹرمپ نے یہ جنگ بندی اس ڈیڈ لائن سے دو گھنٹے قبل قبول کی جس میں تہران سے آبنائے ہرمز کھولنے یا شدید حملوں کا سامنا کرنے کا اعلان کیا گیا تھا۔

ٹرمپ کے اس بیان کہ “ج رات ایک پوری تہذیب ختم ہو جائے گی نے عالمی سطح پر تشویش پیدا کی اور ڈیموکریٹس کی جانب سے شدید ردعمل سامنے آیا، جن میں سے کئی نے انہیں عہدے سے ہٹانے کا مطالبہ بھی کیا۔ چک شومر نے ٹرمپ کے بیانات کو غیر متوازن قرار دیتے ہوئے کہا کہ یہ جنگ ایران کی حکومت کو کمزور کرنے یا اس کے جوہری پروگرام کو روکنے میں ناکام رہی ہے، جبکہ عالمی ایندھن کی قیمتیں بڑھ گئی ہیں۔

دوسری جانب وائٹ ہاؤس کا مؤقف ہے کہ صدر کے اقدامات آئینی دائرہ اختیار میں ہیں اور وہ بطور کمانڈر ان چیف محدود فوجی کارروائی کا حکم دے سکتے ہیں۔ ادھر ایوان نمائندگان میں ڈیموکریٹک رہنما حکیم جیفریز نے بھی ایران جنگ کے خاتمے کے لیے قرارداد لانے کا مطالبہ کیا ہے۔