پینٹاگون نے ایران جنگ میں ہلاک امریکی فوجیوں کی شناخت جاری کردی

امریکی فوج نے منگل کے روز ایران کے خلاف جاری جنگ میں ہلاک ہونے والے پہلے چار امریکی فوجیوں کی شناخت ظاہر کر دی، جبکہ ٹرمپ انتظامیہ نے خبردار کیا ہے کہ بڑھتا ہوا تنازع مزید امریکی ہلاکتوں کا سبب بن سکتا ہے۔ اب تک اس جنگ میں چھ امریکی فوجی جان کی بازی ہار چکے ہیں۔

امریکی فوج کے مطابق چاروں اہلکار اتوار کے روز اس وقت مارے گئے جب ایک ڈرون نے کویت کے پورٹ شویبہ میں واقع امریکی فوجی تنصیب کو نشانہ بنایا۔ یہ فوجی آئیووا سے تعلق رکھنے والے امریکی آرمی ریزرو کے یونٹ 103rd سسٹینمنٹ کمانڈ کا حصہ تھے، جو عالمی سطح پر فوجی لاجسٹکس اور سپلائی آپریشنز کی ذمہ داری سنبھالتا ہے۔ ہلاک ہونے والوں کی عمریں 20 سے 42 سال کے درمیان تھیں۔

فوج نے جاں بحق اہلکاروں کی شناخت کیپٹن کوڈی اے خورک، سارجنٹ فرسٹ کلاس نوح ایل ٹیٹجینز، سارجنٹ فرسٹ کلاس نکول ایم امور اور سارجنٹ ڈیکلین جے کوڈی کے ناموں سے کی ہے۔ 79ویں تھیٹر سسٹینمنٹ کمانڈ کے سربراہ میجر جنرل ٹوڈ ارسکین نے بیان میں لواحقین اور یونٹ کے ارکان سے گہرے دکھ اور تعزیت کا اظہار کیا۔

امریکی صدر ڈونلڈ ٹرمپ اور دیگر اعلیٰ حکام پہلے ہی خبردار کر چکے ہیں کہ ایران کی جوابی کارروائیوں کے نتیجے میں مزید امریکی فوجی ہلاک ہو سکتے ہیں۔ امریکی سینٹرل کمانڈ کے مطابق ایران اب تک مشرق وسطیٰ میں 500 سے زائد بیلسٹک میزائل اور 2,000 سے زیادہ ڈرون داغ چکا ہے۔

کانگریس کے ارکان کو بند کمرہ بریفنگ میں وزیر دفاع پیٹ ہیگسیتھ، جوائنٹ چیفس آف اسٹاف کے چیئرمین جنرل ڈین کین، سی آئی اے ڈائریکٹر جان ریٹکلف اور وزیر خارجہ مارکو روبیو نے بریف کیا۔ سینیٹر کرس مرفی کے مطابق حکام نے اعتراف کیا کہ ڈرون حملوں کو مکمل طور پر روکنا ممکن نہیں اور مزید ہلاکتوں کا خدشہ موجود ہے۔