زیلنسکی کی ٹرمپ سے ملاقات، روس کے ساتھ توانائی کے شعبے میں جنگ بندی پر زور متوقع
- یوکرینی حکام کو خدشہ ہے کہ روس رواں موسم سرما میں بجلی اور حرارتی تنصیبات کو بڑے پیمانے پر نشانہ بنانے کی تیاری کر رہا ہے
یوکرین کے صدر وولودیمیر زیلنسکی منگل کو نیویارک میں اقوام متحدہ کے اجلاس کے موقع پر امریکی صدر ڈونلڈ ٹرمپ سے ملاقات کریں گے، جہاں وہ روس کے ساتھ توانائی کے شعبے میں جنگ بندی پر زور دیں گے۔
یوکرینی حکام کو خدشہ ہے کہ روس رواں موسم سرما میں بجلی اور حرارتی تنصیبات کو بڑے پیمانے پر نشانہ بنانے کی تیاری کر رہا ہے۔ دونوں جانب سے فضائی حملوں میں شدت کے باعث بندرگاہوں، گوداموں، بحری جہازوں اور توانائی کے بنیادی ڈھانچے کو نقصان پہنچا ہے۔
زیلنسکی نے اتوار کو ٹرمپ سے ٹیلی فون پر گفتگو کے بعد کہا کہ سفارتی پیش رفت اور کشیدگی کم کرنے کے اقدامات کے لیے تجاویز موجود ہیں۔ انہوں نے ایکس پر لکھا کہ یوکرین کے توانائی کے شعبے، اہم بنیادی ڈھانچے اور غذائی برآمدات کو روسی حملوں کا نشانہ بننا بند ہونا چاہیے، جس کے جواب میں یوکرین بھی کشیدگی کم کرنے کے اقدامات کرے گا۔
ٹرمپ نے گزشتہ ہفتے دعویٰ کیا تھا کہ روس اور یوکرین توانائی کے اہداف پر حملے نہ کرنے پر متفق ہوگئے ہیں، تاہم اگلے ہی روز روس نے کیف کے پٹرول اسٹیشنوں اور یوکرین نے روسی آئل ریفائنری کو نشانہ بنایا۔
ایک ذریعے کے مطابق توانائی کے شعبے میں جنگ بندی زیلنسکی اور ٹرمپ کی ملاقات میں زیر بحث موضوعات میں شامل ہوگی۔ ٹرمپ نے مبینہ طور پر زیلنسکی سے روسی آئل ریفائنریوں پر حملے روکنے کو کہا ہے۔
زیلنسکی ٹرمپ سے موسم سرما کے لیے امریکی ساختہ پیٹریاٹ فضائی دفاعی میزائلوں کے حصول پر بھی بات کریں گے۔