صحافیوں کیخلاف قانونی کارروائیوں کا بڑھتا استعمال

فریڈم نیٹ ورک کی تازہ ترین ’امپیونٹی رپورٹ 2026‘ کے نتائج پاکستان کی سیاسی قیادت، ریاستی اداروں اور عدلیہ کے لیے خطرے کی گھنٹی ہونے چاہئیں۔ رپورٹ ایک تشویش ناک حقیقت کو اجاگر کرتی ہے کہ صحافیوں کے خلاف دستاویزی طور پر سامنے آنے والی خلاف ورزیوں میں کمی کے باوجود پاکستان آزاد صحافت کے لیے بدستور ایک انتہائی ناموافق ماحول رکھتا ہے۔

رپورٹ ہونے والے واقعات کی کم تعداد کو پریس کی زیادہ آزادی یا صحافیوں کے تحفظ میں بہتری کا ثبوت نہیں سمجھنا چاہیے۔ اس کے بجائے دھمکانے اور دباؤ ڈالنے کے طریقے زیادہ پیچیدہ، ادارہ جاتی اور چیلنج کرنا مشکل ہوتے دکھائی دے رہے ہیں، جہاں روایتی جبر کے طریقوں کے ساتھ قانونی دباؤ کا استعمال بھی تیزی سے بڑھ رہا ہے۔

خصوصی طور پر تشویش ناک امر صحافیوں کے خلاف مقدمات میں پریوینشن آف الیکٹرانک کرائمز ایکٹ (پیکا) کا بڑھتا ہوا استعمال ہے۔ سائبر جرائم کی روک تھام کے لیے بظاہر متعارف کرایا گیا قانون اختلاف رائے کو دبانے، تنقیدی آوازوں کو خاموش کرنے یا سرکاری عہدیداروں کے طرز عمل پر سوال اٹھانے والوں کو خوف زدہ کرنے کا آسان ذریعہ نہیں بننا چاہیے۔

جب بدعنوانی، سرکاری اخراجات اور حکومتی کارکردگی سے متعلق خبریں دینے والے صحافیوں کو تحقیقات، طلبی، حراست اور بار بار عدالتی پیشیوں کا سامنا کرنا پڑے تو احتساب کا بنیادی مقصد ہی متاثر ہوتا ہے۔ لہٰذا قانون کے جائز نفاذ اور اس کے ذریعے ناگوار سوالات کی حوصلہ شکنی کرنے کے درمیان فرق واضح رہنا چاہیے۔

رپورٹ میں اجاگر کیے گئے تصور قانونی محاذ آرائی (لا فیئر) پر خصوصی توجہ دینے کی ضرورت ہے۔ کسی صحافی کو خاموش کرنے کے لیے اس کا مجرم قرار پانا یا جیل جانا ضروری نہیں۔ قانونی کارروائی کا خدشہ، مالی مشکلات، ساکھ کو نقصان، الیکٹرانک آلات کی جانچ پڑتال اور طویل عدالتی مقدمات ہی تحقیقاتی صحافت کی حوصلہ شکنی کے لیے کافی ہوسکتے ہیں۔

اس طرح کے اقدامات خوف اور دباؤ کی فضا پیدا کرتے ہیں، جس کے نتیجے میں صحافی خود سنسرشپ اختیار کرنے پر مجبور ہوتے ہیں اور شہری اپنے حقِ معلومات سے محروم رہ جاتے ہیں۔ اس عمل میں صرف صحافی ہی متاثر نہیں ہوتے بلکہ جمہوری مکالمہ، اداروں کا احتساب اور عوامی مفاد بھی نقصان اٹھاتے ہیں۔

اتنی ہی تشویش ناک رپورٹ کی یہ نشاندہی بھی ہے کہ دستاویزی طور پر سامنے آنے والے تقریباً دو تہائی واقعات میں متاثرین یا ان کے اہل خانہ نے سرکاری حکام اور عہدیداروں کو مبینہ طور پر ان واقعات کا محرک قرار دیا۔ اگر شہریوں کے تحفظ کے ذمہ دار افراد ہی میڈیا سے وابستہ پیشہ ور افراد کو خوف زدہ کرنے میں ملوث قرار دیے جائیں تو احتساب کے امکانات مزید غیر یقینی ہوجاتے ہیں۔

وفاقی سطح پر صحافیوں کے تحفظ کے طریقہ کار کی غیر مؤثریت اور سندھ کمیشن کی محدود رسائی قانون سازی اور اس پر عمل درآمد کے درمیان موجود بڑے خلا کو مزید واضح کرتی ہے۔ کمیشن قائم کرنے اور تحفظ کے قوانین منظور کرنے کا کوئی فائدہ نہیں، جب تک انہیں مناسب اختیارات حاصل نہ ہوں، وہ آزادانہ طور پر کام نہ کرسکیں اور ٹھوس نتائج فراہم کرنے کی صلاحیت نہ رکھتے ہوں۔

صحافی پر ہونے والے ہر حملے کی فوری تحقیقات ہونی چاہئیں اور اس کے ذمہ داروں کو ان کی سیاسی یا ادارہ جاتی حیثیت سے قطع نظر جواب دہ بنایا جانا چاہیے۔

بالآخر پریس کی آزادی کا اصل پیمانہ یہ نہیں کہ کتنے صحافی جسمانی حملوں سے محفوظ رہے، بلکہ یہ ہے کہ آیا وہ کسی خوف یا انتقامی کارروائی کے اندیشے کے بغیر اقتدار میں موجود افراد سے سوال کرسکتے ہیں یا نہیں۔ پاکستان کو خلاف ورزیوں کی دستاویز بندی اور صحافیوں کے تحفظ کے وعدے کرنے سے آگے بڑھنا ہوگا۔ اسے یہ بھی یقینی بنانا ہوگا کہ قوانین کے انتخابی یا حد سے زیادہ استعمال کے ذریعے انہیں سزا دینے کا ذریعہ نہ بننے دیا جائے۔

ریاست کی ذمہ داری صرف صحافیوں کو تشدد سے محفوظ رکھنا نہیں بلکہ اس آزادی کا تحفظ کرنا بھی ہے جو انہیں بااختیار افراد اور اداروں کا احتساب کرنے کے قابل بناتی ہے۔ اس سے کم کوئی بھی اقدام اس استثنیٰ اور عدم احتساب کے کلچر کو مزید مضبوط کرے گا جسے رپورٹ نے واضح طور پر بے نقاب کیا ہے۔

کاپی رائٹ بزنس ریکارڈر، 2026