پیٹرولیم لیوی کے خاتمے کے لیے حکومت اور جماعتِ اسلامی کے مذاکرات آخری مرحلے میں داخل

پیٹرولیم لیوی کے خاتمے اور صارفین کو ریلیف فراہم کرنے کے اقدامات سے متعلق حکومت اور جماعتِ اسلامی (جے آئی) کے درمیان مذاکرات آخری مرحلے میں داخل ہو گئے ہیں، جبکہ دونوں فریقین نے توانائی کی قیمتوں اور عوام کو ریلیف دینے کے حوالے سے مشاورت جاری رکھنے پر اتفاق کیا ہے۔

یہ پیش رفت منگل کے روز نائب وزیراعظم اور وزیر خارجہ سینیٹر محمد اسحاق ڈار اور قائم مقام امیر جماعتِ اسلامی لیاقت بلوچ کی سربراہی میں جماعتِ اسلامی کے وفد کے درمیان ہونے والی ملاقات کے دوران سامنے آئی۔

دفتر خارجہ کی جانب سے جاری بیان کے مطابق دونوں فریقین کے درمیان عام شہریوں، خصوصاً توانائی کی بڑھتی ہوئی قیمتوں کے بوجھ تلے دبے کم آمدنی والے طبقے کو ریلیف فراہم کرنے کے لیے عملی اقدامات پر تفصیلی تبادلۂ خیال کیا گیا۔

دونوں فریقین نے پیٹرولیم مصنوعات کی قیمتوں اور عوام کو ریلیف فراہم کرنے کے حوالے سے آئندہ چند روز تک مشاورت جاری رکھنے پر اتفاق کیا تاکہ مستقبل کے لائحہ عمل کو حتمی شکل دی جا سکے۔

دوسری جانب حکومت کے ساتھ مذاکرات کے بعد پریس کانفرنس سے خطاب کرتے ہوئے لیاقت بلوچ نے کہا کہ پیٹرولیم لیوی کے خاتمے اور عوام کو ریلیف فراہم کرنے سے متعلق مذاکرات آخری مرحلے میں داخل ہو چکے ہیں۔

انہوں نے کہا کہ جماعتِ اسلامی کی ملک گیر احتجاجی مہم اور چھ مطالبات پیش کیے جانے کے بعد حکومت نے عوام کو ریلیف دینے اور پیٹرولیم لیوی ختم کرنے کے مطالبات کو جائز تسلیم کر لیا ہے۔

لیاقت بلوچ نے بتایا کہ دونوں فریقین کے درمیان زرعی شعبے، پبلک ٹرانسپورٹ اور گاڑیوں کی بعض اقسام کو ریلیف فراہم کرنے پر اتفاق ہوا ہے۔

انہوں نے مزید کہا کہ حکومت پیر کے روز آئل ریفائنریوں کے منافع اور پیٹرولیم لیوی کے بتدریج خاتمے سے متعلق اپنی تیاری مکمل کرے گی، جبکہ منگل کے روز اس حوالے سے ورکنگ پیپر تیار کیا جائے گا۔

ان کا کہنا تھا کہ حتمی معاہدے کے مسودے کا جائزہ لینے کے بعد جماعتِ اسلامی کے امیر حافظ نعیم الرحمٰن پارٹی کے آئندہ لائحہ عمل کا اعلان کریں گے۔

دفتر خارجہ کے بیان کے مطابق اسحاق ڈار نے عالمی معاشی چیلنجز کے باوجود عوامی فلاح و بہبود کو ترجیح دینے اور عام شہریوں کو سہولت فراہم کرنے کے حکومتی عزم کا اعادہ کیا۔

انہوں نے اس بات پر بھی زور دیا کہ ملک کو درپیش معاشی چیلنجز سے نمٹنے کے لیے سیاسی جماعتوں کے درمیان مسلسل مذاکرات اور مشاورت ضروری ہے۔

اجلاس میں وزیر برائے منصوبہ بندی، ترقی و خصوصی اقدامات، وزیراعظم کے مشیر برائے بین الصوبائی رابطہ، وزیراعظم کے معاونِ خصوصی طارق باجوہ، سیکریٹری خزانہ اور اسپیشل سیکریٹری پیٹرولیم نے بھی شرکت کی۔