کولگیٹ پامولیو کا پی اینڈ جی کے پورٹ قاسم اثاثے خریدنے کا معاہدہ

کولگیٹ پامولیو (پاکستان) لمیٹڈ نے پراکٹر اینڈ گیمبل پاکستان (پرائیویٹ) لمیٹڈ کے ساتھ کراچی کے پورٹ قاسم پر واقع زمین، پیداواری یونٹ اور متعلقہ اثاثے خریدنے کا معاہدہ کرلیا ہے۔

اعلامیہ کے مطابق کمپنی نے بدھ کو پاکستان اسٹاک ایکسچینج (پی ایس ایکس) کو آگاہ کیا کہ معاہدے پر 28 اکتوبر 2026 کو دستخط کیے گئے۔

کمپنی کے مطابق اثاثوں کی خریداری کا یہ معاہدہ مسابقتی کمیشن آف پاکستان (سی سی پی) کی منظوری سے مشروط ہے۔

پراکٹر اینڈ گیمبل (پی اینڈ جی) نے گزشتہ سال عالمی سطح پر کاروباری تنظیمِ نو کے منصوبے کے تحت پاکستان میں اپنی کاروباری سرگرمیاں بند کرنے کا اعلان کیا تھا۔

اس منصوبے کے تحت پی اینڈ جی پاکستان اور گلٹ پاکستان لمیٹڈ کی پیداواری اور تجارتی سرگرمیاں مرحلہ وار ختم کرنے اور صارفین کو خدمات کی فراہمی جاری رکھنے کے لیے تھرڈ پارٹی ڈسٹری بیوٹر ماڈل اپنانے کا فیصلہ کیا گیا تھا، جس کے ذریعے کمپنی دیگر علاقائی آپریشنز سے پاکستانی صارفین کو مصنوعات فراہم کرتی رہے گی۔

پی اینڈ جی کی یہ حکمتِ عملی عالمی سطح پر ترقی اور کاروباری قدر میں اضافے کی کوششوں کا حصہ تھی۔ اس کے تحت کمپنی نے دنیا بھر میں مینوفیکچرنگ کے علاوہ دیگر شعبوں میں 7 ہزار ملازمتیں ختم کرنے اور مختلف منڈیوں میں بعض مصنوعات کے شعبوں اور برانڈز سے دستبردار ہونے کا منصوبہ بھی بنایا تھا۔

پی اینڈ جی پاکستان نے رواں سال مئی میں اپنی کاروباری سرگرمیاں سمیٹنے کے عمل کے تحت پورٹ قاسم پر واقع زمین، پیداواری یونٹ اور متعلقہ اثاثے کولگیٹ پامولیو (پاکستان) لمیٹڈ کو فروخت کرنے کے منصوبے کا اعلان کیا تھا۔

کولگیٹ پامولیو (پاکستان) لمیٹڈ 1977 میں نیشنل ڈٹرجنٹس لمیٹڈ کے نام سے پبلک لمیٹڈ کمپنی کے طور پر قائم کی گئی تھی۔

1990 میں امریکی کمپنی کولگیٹ پامولیو کمپنی کے ساتھ شراکت داری کا معاہدہ کرنے کے بعد اس کا نام تبدیل کرکے موجودہ نام رکھ دیا گیا۔ کمپنی ڈٹرجنٹس، ذاتی نگہداشت اور دیگر متعلقہ مصنوعات تیار اور فروخت کرتی ہے۔