چینی کمپنی کی پنجاب میں الیکٹرک بائیکس کا پلانٹ لگانے میں دلچسپی

چین کی کمپنی یادیہ ٹیکنالوجی گلوبل گروپ نے مقامی ضروریات پوری کرنے اور برآمدات کے لیے پنجاب میں الیکٹرک موٹر سائیکلوں کی تیاری کا پلانٹ لگانے میں دلچسپی ظاہر کی ہے۔

اس حوالے سے صوبائی وزیر صنعت و تجارت چوہدری شافع حسین اور یادیہ ٹیکنالوجی گلوبل گروپ کے چیئرمین چیو ژن یانگ کے درمیان لاہور میں ملاقات ہوئی، جس میں پنجاب کے الیکٹرک وہیکل سیکٹر میں سرمایہ کاری کے مواقع پر تبادلہ خیال کیا گیا۔

چینی کمپنی کے نمائندوں نے بتایا کہ گروپ چین اور دیگر ممالک میں الیکٹرک دو پہیہ گاڑیوں کے پانچ کارخانے قائم کرچکا ہے اور پنجاب میں اپنا چھٹا پلانٹ لگانے کا ارادہ رکھتا ہے۔ وفد نے الیکٹرک بائیکس کے لیے تیز رفتار چارجنگ ٹیکنالوجی کی دستیابی سے بھی آگاہ کیا۔

چوہدری شافع حسین نے سرمایہ کاری میں دلچسپی کا خیرمقدم کرتے ہوئے کہا کہ متعدد چینی کمپنیاں پنجاب کے الیکٹرک وہیکل شعبے میں سرمایہ کاری کرچکی ہیں اور کئی پلانٹس بھی کام کر رہے ہیں۔ انہوں نے یقین دہانی کرائی کہ خصوصی اقتصادی زونز میں پلانٹ لگانے کے لیے یادیہ گروپ کو ہر ممکن سہولت فراہم کی جائے گی۔

صوبائی وزیر نے چارجنگ اسٹیشنز میں سرمایہ کاری اور شیخوپورہ کے قائداعظم بزنس پارک میں قائم ٹیکنالوجی کالج کے ساتھ مشترکہ منصوبے یا تعاون کی تجویز بھی دی۔ انہوں نے کہا کہ حکومت روایتی پیٹرول موٹر سائیکلوں کی جگہ بتدریج الیکٹرک بائیکس متعارف کرانا چاہتی ہے۔