ملک بھر میں پولیس کیریکٹر سرٹیفکیٹ کے اجراء کے لیے یکساں نظام کی منظوری

اسلام آباد میں وفاقی وزیرِ داخلہ محسن نقوی کی زیرِ صدارت منعقدہ اجلاس میں ملک بھر کے لیے پولیس کیریکٹر سرٹیفکیٹ (کلیئرنس سرٹیفکیٹ) جاری کرنے کے یکساں نظام کی اصولی منظوری دے دی گئی۔

وزارتِ داخلہ کی جانب سے سوشل میڈیا پر شیئر کی گئی ایک پوسٹ کے مطابق وزیرِ داخلہ محسن نقوی نے کہا کہ پولیس کلیئرنس سرٹیفکیٹ اب نیشنل پولیس بیورو کے ذریعے جاری کیے جائیں گے۔

انہوں نے کہا کہ پولیس کلیئرنس سرٹیفکیٹ کے حصول کا سابقہ پیچیدہ طریقہ کار اب آسان، تیز تر اور مکمل طور پر آن لائن بنا دیا گیا ہے۔وزیرِ داخلہ نے بین الاقوامی ڈرائیونگ پرمٹ جاری کرنے کے لیے بھی ایک یکساں نظام قائم کرنے کی ہدایت کی ہے۔انہوں نے کہا کہ پولیس کلیئرنس سرٹیفکیٹ اور بین الاقوامی ڈرائیونگ پرمٹ کے لیے ایک معیاری و یکساں نظام سے بیرونِ ملک سفر کرنے والے شہریوں کے لیے عمل کافی آسان ہو جائے گا۔

محسن نقوی کا کہنا تھا کہ نیشنل پولیس بیورو کو ایک متحرک اور فعال ادارے میں ڈھالنا حکومت کی اولین ترجیحات میں شامل ہے۔وزیرِ داخلہ نے یہ بھی کہا کہ پولیس کے شہداء قوم کا فخر ہیں اور ملک میں امن و امان کے قیام اور جرائم کے خاتمے کے لیے ان کی عظیم قربانیوں کو ہمیشہ یاد رکھا جائے گا۔