پاک فوج کے افسران، جوانوں اور شہداء کو عسکری اعزازات سے نواز دیا

پاک فوج کے افسران، جوانوں اور شہداء کو عسکری اعزازات دینے کے لیے جنرل ہیڈ کوارٹرز (جی ایچ کیو) راولپنڈی میں تقریب کا انعقاد کیا گیا۔

فوج کے شعبہ تعلقات عامہ (آئی ایس پی آر) کے مطابق چیف آف آرمی اسٹاف اور چیف آف ڈیفنس فورسز، فیلڈ مارشل سید عاصم منیر نے تقریب میں بطورِ مہمانِ خصوصی شرکت کی اور وطنِ عزیز کے دفاع اور بقا کے لیے غیر معمولی خدمات انجام دینے والے افسران، جوانوں اور شہداء کے اہلخانہ کو اعزازات سے نوازا۔

آئی ایس پی آر کے مطابق ان اعزازات میں 50 ستارہِ امتیاز (ملٹری) اور 12 تمغہِ بسالت شامل تھے۔ جامِ شہادت نوش کرنے والے شہداء کے تمغے ان کے اہلخانہ نے وصول کیے۔

تقریب سے خطاب کرتے ہوئے فیلڈ مارشل نے شہداء کی قربانیوں کو زبردست الفاظ میں خراجِ تحسین پیش کیا۔

فیلڈ مارشل سید عاصم منیر کا کہنا ہے کہ شہداء اور غازی قوم کا ہمیشہ قائم رہنے والا فخر ہیں، شہداء کی عزت اور قربانی ہر پاکستانی کے لیے مقدس امانت ہے۔

انہوں نے شہداء کے خاندانوں کے عزم و حوصلے اور ثابت قدمی کی بھی تعریف کی اور دہشت گردی کے خلاف جنگ میں پاک فوج اور قانون نافذ کرنے والے اداروں کی آپریشنل تیاریوں کو سراہا۔

عسکریت پسندی کے خلاف ملک کے پختہ عزم کا اعادہ کرتے ہوئے، چیف آف ڈیفنس فورسز جنرل عاصم منیر نے کہا کہ دہشت گردوں کے خلاف آپریشنز اس وقت تک جاری رہیں گے جب تک ملک بھر میں پائیدار امن اور استحکام حاصل نہیں ہوجاتا۔